Bıyl Qaraǵandy oblysynda «Nurly jer» baǵdarlamasy aıasynda kólemi 10,1 mıllıard teńge bolatyn turǵyn úı, ıaǵnı 4,3 myń páter qurylysyn qarjylandyrý qarastyrylǵan. Jalpy, turǵyn úı qurylysy tek oblys ortalyǵynda ǵana emes, óńirdiń basqa da qalalarynda belsendi túrde júrgizilýi tıis dep sanaıdy jergilikti bılik. Mysaly, óńirdiń Jezqazǵan, Temirtaý jáne Balqash sııaqty qalalarynda turǵyn úıge degen suranys óte joǵary.
Qaraǵandy oblystyq qurylys, sáýlet jáne qala qurylysy basqarmasynyń basshysy Taıhan Qalmahanov keltirgen derekter boıynsha, bıyl qańtar-sáýir aılary aralyǵynda 136,6 myń sharshy metr turǵyn úı paıdalanýǵa berilgen. Osy kólemniń 38,5%-ǵa jýyǵy jekemenshik úılerge tıesili bolsa, kommersııalyq baspananyń úlesi 37,8%-dy quraıdy. Al 23,6%-y memlekettik sektordaǵy turǵyn úıdiń enshisinde.
Bıyl respýblıkalyq bıýdjetten arendalyq baspana qurylysyna 2,1 mlrd teńge bólindi. Salynýǵa tıis 520 páterdiń 260-y qazirdiń ózinde paıdalanýǵa berilgen. Atap aıtqanda, Saran qalasynda – 120, Temirtaýda – 50, Prıozersk qalasynda 24 páter óz ıelerin tapty. Sonymen qatar Buqar jyraý aýdanynda – 32, Aqtoǵaıda – 6, Jańaarqada – 16, al Shet aýdanynda 12 páterde qonys toıy toılandy. Budan bólek bıyl qaıtalama naryqta 204 páter satyp alý úshin respýblıkalyq bıýdjetten 1,5 mlrd teńge bólinbekshi.
Qazirgi tańda jergilikti bıýdjetter esebinen qurylys qarqyndy júrgizilip jatyr. Sonyń nátıjesinde bıyl 1 mamyrǵa deıin kóp balaly 27 otbasy arendalyq páter kiltine ıe boldy. Al aıdyń sońyna taman taǵy da 106 kóp balaly otbasy baspanaǵa ıe bolyp, qonys toıyn toılady.
Sonymen qatar bıyl jyldyq ósimi bar-joǵy 2% bolatyn jeńildetilgen nesıeni «Turǵynúıqurylysjınaqbanki» arqyly rásimdeý úshin oblystyq bıýdjetten 1 mıllıard teńge qarjy bólinedi. Iаǵnı, «7-20-25» baǵdarlamasy boıynsha bastapqy jarnasyz ıpotekalyq nesıe berilgende, onyń 10%-y turǵyn úı sertıfıkaty arqyly jabylady. Al joǵaryda aıtylǵan 1 mlrd teńge somaǵa 159 jeńildetilgen ıpotekalyq zaım rásimdeý josparda bar.
Jalpy, bıyl Qaraǵandy oblysy boıynsha turǵyn úı kezeginde 700 kóp balaly jáne az qamtylǵan otbasy baspanaly bolý baqytyn sezinedi. Bul ıgi isten jergilikti kásipkerlerdiń de shet qalmaı, kómek qolyn sozǵanyn aıta ketý lázim. Mysaly, joǵaryda aıtylǵan 700 otbasyna buıyratyn baspananyń úshten biri bıznes ókilderiniń demeýshiligi arqasynda múmkin bolmaqshy.
Sala mamandarynyń aıtýynsha, qazirgi ýaqytta oblysta tapsyrys berýshiler tarapynan emhanalar men jalpy bilim beretin jáne sporttyq mektepter, sondaı-aq turǵyn úı qurylystaryna degen suranys mol. Byltyr óńirde qurylys jumystarynyń kólemi 185 mlrd teńgege oryndaldy. Bul degenińiz, 416 myń sharshy metrdi quraıtyn turǵyn úı paıdalanýǵa berildi degen sóz. Iаǵnı, tórt myń páterde qonys toıy toılandy. Mundaı qarqyn basqa aımaqtarmen salystyrǵanda baıaýlaý bolǵanymen, Qaraǵandy oblysynda qurylys jumystarynyń barynsha qyzý júrgizilip jatqanyn aıta ketken jón.
