Nur Otan partııasynyń bastamasymen qurylǵan Demokratııalyq kúshterdiń «Qazaqstan-2050» Jalpyulttyq koalısııasy – eldegi eń úlken dıalog alańdarynyń biri. Ol 5 saıası partııanyń jáne 24 iri qoǵamdyq birlestiktiń basyn biriktirip, 6,5 mln qazaqstandyqtyń múddesin qorǵaıdy.
Keleli keńeste Nur Otan partııasy Tóraǵasynyń birinshi orynbasary Máýlen Áshimbaev qazirgi tańda Qazaqstan damýdyń jańa dáýirine qadam basqanyn aıtty. Ol saılaýda qazaqstandyqtardyń basym bóligi óz daýystaryn Qasym-Jomart Toqaevqa berip, Elbasymyzdyń strategııalyq saıasatynyń sabaqtastyǵy men elimizdiń turaqty damýyn tańdaǵanyn, sonyń nátıjesinde Qazaqstanda joǵary bıliktiń aýysýy elimizdiń barlyq zańyna sáıkes júrgizilgenin atap ótti. Osylaı deı kele Memleket basshysy ulyqtaý rásiminde atap kórsetken bılik pen qoǵamnyń aldynda turǵan eń negizgi maqsattarǵa toqtaldy.
– Qazaqstan Prezıdenti Qasym-Jomart Toqaev bılik pen azamattyq qoǵam arasyndaǵy dıalogty ári qaraı damytý kerektigine erekshe nazar aýdardy. Onyń bir dáleli – Memleket basshysynyń Jarlyǵymen qurylǵan Ulttyq qoǵamdyq senim keńesi. Bul – Qazaqstanda azamattyq qoǵamdy damytý jolynda jasalǵan naqty qadam. Memleket basshysy atap ótkendeı, birtutas ult bolyp qalý – bizdiń basty baǵdarymyz. Sondyqtan judyryqtaı jumylyp, qoǵamnyń barlyq ókilderin, sonyń ishinde jastardy da dıalogqa shaqyryp, birigip áreket etsek qana kózdegen maqsattarymyzǵa qol jetkizemiz. Ulttyq qoǵamdyq senim keńesi azamattyq qoǵamnyń damýyna tyń serpin berip qana qoımaı, jańǵyrý men reformalardyń ózegine de aınalady dep qabyldaımyz. Mıllıondaǵan qazaqstandyqtyń pikiri men kózqarasyn bildiretin Demokratııalyq kúshterdiń Jalpyulttyq koalısııasy osyndaı mańyzdy kezeńde Elbasy saıasatynyń sabaqtastyǵyn qamtamasyz etip, Prezıdentimizdiń eldiń aldyna qoıyp otyrǵan maqsattarǵa qol jetkizýine óziniń súbeli úlesin qosýy úshin jumys isteıdi, – dedi Máýlen Áshimbaev.
Otyrysqa eldegi jetekshi partııalardyń basshylary, Parlament depýtattary, Qazaqstan halqy Assambleıasynyń, kásibı jáne qoǵamdyq birlestikterdiń ókilderi qatysty. Jıyn barysynda koalısııa múshesi, «Aq jol» demokratııalyq partııasynyń tóraǵasy Azat Perýashev sóz alyp, táýelsizdiktiń, turaqtylyqtyń qadirin bilip, tynyshtyq pen beıbit ómirdi saqtaýymyz kerektigin, ol úshin qoǵamdaǵy ózekti máselelerdi zań sheńberinde sheshý mańyzdy ekenin jetkizdi.
Budan keıin «Birlik» partııasynyń tóraǵasy Serik Sultanǵalı Tuńǵysh Prezıdent óńirlerdiń ákimderine halyqtyń ál-aýqatyn kóterý úshin barlyq múmkindikti jasaǵanyn atap kórsetti. Tek ákimderdiń sol údeden shyǵa bilýi kerek-ti. Iаǵnı, ákimderdiń salǵyrt jumysynyń sońy osyndaı daýǵa ulasty degen pikirde.
Al «Aýyl» partııasy tóraǵasynyń birinshi orynbasary Tolymbek Ǵabdiláshimov jınalǵan qaýymnyń nazaryna agroónerkásip keshenin damytýǵa barynsha kóńil bólý, sol arqyly halyqtyń turmysyn túzeý týraly usynys bildirdi. Sondaı-aq saılaýaldy naýqan barysynda aýyldardy gúldendirý keńinen nasıhattalǵanyn atap ótti. Onyń bul oıyn Máýlen Áshimbaev ta quptap, halyqtyń 42 paıyzy aýyldarda turatynyn, sondyqtan bul salaǵa basymdyq beriletinin qosa aıtty.
Sonymen qatar bul otyrysta «Jańarý» sybaılas jemqorlyqqa qarsy jalpyulttyq qozǵalysy» RQB prezıdenti Oralbaı Ábdikárimov, Qazaqstan Respýblıkasy Kásipodaqtar federasııasynyń tóraǵasy Baqytjan Ábdiraıym, «Atameken» ulttyq kásipkerler palatasynyń basqarma tóraǵasy Abylaı Myrzahmetov jáne «Qazaqstan tutynýshylarynyń ulttyq lıgasy» RQB tóraıymy Svetlana Romanovskaıa sóz sóılep, Ulttyq qoǵamdyq senim keńesiniń jumysyn jandandyrý úshin jan-jaqty pikirlerin ortaǵa saldy.
Is-shara sońynda barsha qazaqstandyqtardy yntymaqqa, birlikke, qazaqstandyq damý jolynyń basty qundylyqtary – qoǵamdyq kelisim men saıası turaqtylyqty, etnosaralyq jáne konfessııaaralyq beıbitshilik pen tózimdilikti saqtaýǵa, sondaı-aq barlyq qoǵamdyq-saıası kúshterdi saılaýdan keıingi kezeńde elimizdiń strategııalyq maqsattary jolynda birigýge, Qazaqstan Prezıdentiniń el damýynyń ózekti máselelerine qatysty bılik pen azamattyq qoǵam arasynda turaqty jáne konstrýktıvti dıalog qurý bastamasyn qoldaýǵa shaqyrǵan Úndeý qabyldandy.
