Qazaqstan óz baǵytynan aýytqymaıdy. Sholý

Fransııanyń Le Nouvel Observateur atty jýrnaly Qazaqstannyń jańa Pre­zıdentiniń tájirıbeli saıasatker ekenin, saılaýǵa jeti úmitker túskenin jazdy. Saılaýǵa Qazaqstan halqynyń 77 paıyzy qatysqanyn atap kórsetip, júzdegen sheteldik baıqaýshynyń saıası sharany baqylaǵanyn  habarlady. Odan ári saılaýda 70 paıyzdan joǵary daýys jınap, úlken basymdyqpen jeńiske jetken jańa Prezıdent Qasym-Jomart Toqaevtyń ulyqtaý rásimine 2500 adam qatysqanyn jarııalaǵan. «Qazaqstannyń memlekettik Týy men Qazaqstan Respýblıkasynyń Konstı­týsııasy Táýelsizdik saraıynyń Úlken zalyna ákelinip, jańadan saılanǵan Qazaqstan Respýblıkasynyń Prezıdenti Memlekettik kúzet qyzmeti bastyǵynyń raportyn qabyldap, ishke kirdi. Qazaqstan Prezıdenti el Konstıtýsııasynyń 42-babyna sáıkes, halqyna ant berdi», dedi fransııalyq basylym.

Sonymen qatar rásim sońynda Qazaq­stan Respýblıkasynyń Prezı­denti – Qazaqstan Qarýly Kúshteriniń Jo­ǵarǵy Bas qolbasshysy Táýelsizdik sa­raıynyń aldyndaǵy alańda Qazaq­stan­nyń Qorǵanys mınıstri Nurlan Ermekbaevtan raport qabyldaǵanyn, Memleket basshysy aldynan Qarýly Kúshterdiń ásker túrleri saltanatty sap túzep ótkenin jazdy.

Shvesııada fransýz tilinde shyǵa­tyn Le Temps jýrnaly BUU-nyń Jenevadaǵy ókildiginiń burynǵy basshysy Qazaqstannyń jańa Prezıdenti bolyp taǵaıyndaldy dep jazady. «Qazaqstan halqy jeksenbi kúni jańa Prezıdentin anyqtaý úshin saılaýǵa bardy. Bul saılaýǵa memlekettiń Tuńǵysh Prezıdenti úmitker retinde qatyspady. Saılaýda Nur Otan partııasynyń ókili Qasym-Jomart Toqaev jeńiske jetti. Al 12 maýsym kúni jańa saılanǵan Prezıdent Qazaqstan halqyna ant berip, ulyqtaý rásimi ótti», dedi shved jýrnaly.

Sonymen birge sheteldik aqparat quraly Qasym-Jomart Toqaev aldymen ózin qoldaǵan halyqqa alǵysyn bil­dirip, óz baǵdarlamasyn tanystyryp ótkenin habarlady. «Q.Toqaev Nursultan Nazarbaevtyń saıasatyn jal­ǵas­­tyratynyn, oǵan qosa halyq­ara­lyq qatynastardy odan ári damytyp, kóp­vektorly saıasat júrgizetinin málim­dedi», dep jazdy basylym.

Irlandııanyń Dublin News onlaın-gazeti de elimizdegi aıtýly sharadan habar bergen. Gazettiń jazýynsha, Qasym-Jomart Toqaev Qazaqstannyń jańa Prezıdenti retinde ulyqtaldy. Sal­tanatty rásim 9 maýsymdaǵy saılaýdyń nátıjesi boıynsha ótti.

«Qazaqstannyń Tuńǵysh Prezıdenti Nursultan Nazarbaevtyń usynysy bo­ıynsha saılaýǵa túsken Q.Toqaev 12 maý­­symda Nur-Sultan qalasyndaǵy Tá­ýel­sizdik saraıynda ótken rásimnen keıin resmı túrde el tizginin qolyna us­tady. Memleket qaıratkeri 70 paıyzdan astam daýys jınady. Ulyqtaý rásiminde sóılegen sózinde Q.Toqaev birqatar ma­ńyzdy máselege toqtalyp, el úshin jasalatyn jumystar tóńireginde áńgime qozǵady», dep habarlady ırlandııalyq gazet.

Sondaı-aq basylym bılik pen halyq arasyndaǵy dıalog kerek ekenin, Ulttyq qoǵamdyq senim keńesi qurylatynyn má­lim­dedi. Onyń quramyna belsendi jas­tar­dyń kiretinin atap ótti.

«Prezıdent ant berý rásiminde «Eldiń damýy, saıası qarqyndy esepke alǵanda, sıfrly júıege kóshýmen tikeleı baılanysty. Ol memleket pen qoǵam qarym-qatynasynyń quramyn sapaly túrde ózgertedi. Elbasynyń «Sıfrly Qazaqstan» atty bekitilgen memlekettik baǵdarlamasy oryndalýy tıis», dep Qazaqstannyń Tuń­ǵysh Prezıdenti N.Nazarbaevtyń saıa­saty jalǵasyn tabatynyn bildirdi» dep jazdy sheteldik aqparat quraly.

Al Japonııanyń The Mainichi ulttyq gazeti «Qazaqstannyń jańa Prezıdenti Qasym-Jomart Toqaev óziniń ınaýgý­ra­­sııasynda burynǵy Prezıdent Nursultan Nazarbaevtyń saıasatyn jalǵas­tyratynyn aıtty. 9 maýsym kúni ótken prezıdenttik saılaýda Toqaev 70 paıyzdan astam daýyspen jeńiske jetken edi», dep jazdy.

Gazet Q.Toqaevtyń bu­ǵan deıin Qazaqstan Respýblıkasy Par­lamentiniń Joǵarǵy palatasynda spıker bolǵanyn, onyń aldynda eldiń Úki­meti men Syrtqy ister mınıstrligin bas­qarǵanyn, BUU Bas hatshysynyń orynbasary bolǵanyn jazdy.

Ekonomıkasy negizinen shıkizatqa negizdelgen memlekette shaǵyn jáne orta bıznesti damytyp, ekonomıkany ártaraptandyrý Q.Toqaevtyń birin­shi mindeti bolmaq. Onyń ústine, sońǵy jyldary qolǵa alyna bastaǵan medısınalyq saqtandyrý men jyljymaıtyn múlik naryǵyn odan ári damytý da jańa Prezı­denttiń moınyna júkteletini sózsiz.

Al syrtqy saıasatqa keler bolsaq, Qazaqstan bul baǵytta aıtarlyqtaı ózge­riske bara qoımaıtyn sekildi. Saıası mansabynda negizinen dıplomatııalyq qyzmetterde bolǵan Q.Toqaev N.Nazarbaev­tyń syrtqy saıasatyn júrgizý­shiler­diń biri bolǵan desek, artyq aıtqan­dyq emes», delingen Japonııanyń ulttyq gazetiniń habarlamasynda.