Qysqy sport • 17 Maýsym, 2019

Qarsylastardyń osaly joq

192 ret kórsetildi

Shaıbaly hokkeıden Slovakııada ótken álem chempıonaty aıaqtalǵan bette kelesi jarystyń jerebesi tartylyp, qatysýshy komandalardyń qaısysy qaı topta oınaıtyny belgili boldy. Jerebe tartý rásimin Qazaqstannyń jankúıerleri de taǵatsyzdana kútti. Sebebi 2020 jyldyń 8-24 mamyry aralyǵynda Shveısarııanyń qos qalasy – Sıýrıh pen Lozannada jalaýy jelbireıtin baıraqty básekede bizdiń jigitter de óner kórsetedi.

Halyqaralyq shaıbaly hokkeı federasııasy (IIHF) qabyldaǵan erejege saı 1998 jyldan beri álem chempıonattarynda eń úzdik dep tanylǵan 16 komanda ǵana baq synaıdy. Solardyń arasynan alǵashqy 14 orynǵa turaqtaǵandar kelesi jyly da elıtalyq dıvızıonda óner kórsetedi. Al ózgelerden upaıy kem qos qurama tómengi topqa túsedi. Sodan olar irikteý saıystaryna qaıta qatysyp, myqtylardyń qataryna qosylýǵa laıyq ekenderin dáleldeýge tıis. Máselen, bıyl Nur-Sultanda ótken dodada Qazaq­stan men Belarýstyń joly bolyp, osy qos eldiń órenderi Shveısarııadaǵy ja­rysqa qatysý quqyǵyna ıe boldy. Kerisinshe jýyrda ǵana aıaqtalǵan Slovakııadaǵy saıysta eń az upaı jıǵan Fransııa men Aýstrııa kelesi maýsymdy birinshi dıvızıonda ótkizedi.

Aldaǵy jyly jaǵdaı sál qıyndaý bolaıyn dep tur. Olaı deýge negiz,  Shveısarııadaǵy doda Belarýs pen Latvııa quramalary eń az upaı jıǵan jaǵ­daıdyń ózinde elıtalyq dıvızıonda qalady. О́ıtkeni 2021 jylǵy álem­dik doda atalǵan qos memlekette ótedi. Al IIHF bekitken erejege saı jarys qojaıyndary mindetti túrde óz hokkeıshilerin muzaıdynǵa shyǵarýǵa tıis.

2020 jylǵy álem chempıonatynda Qazaqstannyń hokkeıshileri «V» tobynda Reseı, Fınlıandııa, AQSh, Ger­manııa, Latvııa, Norvegııa jáne Ita­lııa quramalaryna qarsy oınaıdy. Alǵashqy úsheýine álimiz jetpeıtinin moıyndamasqa laj joq. KSRO ydy­raǵannan keıingi kezeńdi alsaq, Reseı álem chempıonattarynda 13 márte (5 altyn+3 kúmis+5 qola) jeńis tuǵyryna kóterildi. Fınlıandııa 14 ret (3+8+3) dál sondaı qurmetke bólendi. AQSh ta 14 márte (2+4+8) júldeli oryndardy ıelendi. Onyń ústine Sýomı eliniń ókilderi bıylǵy dodada altyn alsa, orys­tar qolaǵa qol sozdy. Odan bólek, olardyń Olımpııa oıyndarynda san márte atoı salǵandary taǵy bar.

Germanııa quramasyn da myqtylar sanatyna qosýǵa bolady. О́tken ǵa­syrdyń jetpisinshi jyldardyń aıaǵyna deıin olar Olımpııa oıyndary men álem chempıonattarynda ara-tura úzdik úshtiktiń qatarynan kórinip júrgeni kóziqaraqty kórermenniń esinde. So­dan keıin nemis hokkeıi toqy­­raýǵa ushyrady. Jarty ǵasyrdan asa ýaqyt boıy olar eńse tikteı almaı keldi. Alaı­da olardyń qandaı isti qolǵa alsa da, dóńgeletip áketetini belgili ǵoı. 2018 jyly Phenchhan Olımpıadasynda Ger­manııa hokkeıshileri aıdy aspanǵa shyǵaryp, qola medaldy ıelendi. Bıyl Slovakııadaǵy dodada óz tobynda úshinshi oryn (5 jeńis, 2 jeńilis) alyp, shırek fınalda Chehııadan 1:5 ese­­bimen utyldy. Jer jahannyń myq­tylary jınalǵan jarysta ozyq segiz ko­mandanyń qataryna qosylý da az olja emes. Mine, osy jaıttyń barlyǵyn saralaı kele, jerlesterimizge nemistermen úzeń­gi qaǵystyrý ońaı bolmaıdy degen oıǵa keldik.

Al Latvııa, Norvegııa jáne Ita­lııamen teń dárejede aıqasýǵa da, tipten olardy utýǵa da bolady. Sol úshtiktiń arasyndaǵy eń qaýiptisi – latvııalyqtar. Baltyq jaǵalaýynyń ókilderi 1997 jyldan beri álem chempıo­nattaryna úzdiksiz qatysyp keledi. Eń úzdik nátı­jesi – úsh márte (1997, 2004, 2009) je­tinshi orynǵa taban tireýi. Bıylǵy dodada olar óz tobynda besinshi satyǵa (3 jeńis, 4 jeńilis) jaıǵasty. 

Jańa ǵasyrdaǵy Norvegııanyń álem­dik dodadaǵy eń táýir kórsetkishi – 2011­ jyly altynshy oryndy ıelenýi. Oǵan deıin de, odan keıin de ala-qu­la óner kórsetti. Bıylǵy jarystyń top­tyq týrnırinde Skandınavııanyń saıyp­qyrandary altynshy satyǵa (2 jeńis, 5 jeńilis) jaıǵasty. 

Italııa quramasy úzdik ondyqtyń qataryna sońǵy ret 1998 jyly qo­syl­ǵan eken. Sodan bergi 21 jyl ara­lyǵynda birde elıtalyq dıvızıonda oınasa, birde birinshi topta baq synaýda. Sońǵy álem chempıonatynda Apennın túbeginiń túlekteri óz tobynda jetinshi oryndy (1 jeńis, 6 jeńilis) qanaǵat tutty. Osy jalǵyz jeńistiń arqasynda myqtylarmen kúsh synasý quqyǵyn saqtap qaldy.

Kelesi jyly Shveısarııada ótetin álem chempıonatynda Qazaqstan qura­masy qalaı da Norvegııa men Ita­lııa qu­ramalarynan ozýǵa tıis. Qajet bol­sa, Latvııany da eńserýge shama-shar­qymyz jetedi. Búgingi tańda eli­mizde shaıbaly hokkeıge jaqsy kóńil bólinýde. Qurlyqtyq hokkeı lıgasynda (QHL) Nur-Sultannyń «Barys» jáne Joǵary hokkeı lıgasynda (JHL) Qaraǵandynyń «Saryarqa» klýbtary aıshyqty oıyndarymen kózge túsip júr. Ulttyq komandamyzdyń namysyn qorǵap júrgen jigitterdiń kóbi bi­raz jyldan beri QHL dodasynda ábden ysyldy. Sonymen qatar Ka­nada, AQSh jáne Shvesııadan kelgen hokkeıshiler ulttyq komandamyzdy ájeptáýir kúsheıtti. Qazaqstannyń azamattyǵyn alǵan sol sańlaqtar da muzaıdynda aıanbaı aıqasyp, otandyq hokkeıimizdiń dańqyn arttyrýǵa súbeli úles qosyp júrgenine dúıim jurt kýá. Eger Andreı Skabelka kelesi jyly da osyndaı sheber oıynshylardan ortaq maqsatqa jumylǵan jaqsy bir komanda jasaqtaı alsa, onda olar asýymyzdyń burynǵydan áldeqaıda bıik bolatyny anyq. Al Qazaqstan quramasy osy kúnge deıin álem chempıonattaryna 8 márte qatysqanymen, áli de 12-orynnan asa alǵan joq. Al sońǵy úsh baıraqty básekede kósh sońynda qalyp qoıdyq. Al endi kelesi jyly sol olqylyqtyń orny tolyp, Shveısarııadaǵy jarysta úzdik ondyqtyń qataryna qosylamyz degen úmit zor.

2020 jylǵy álem chempıonatynda «V» tobynda kimderdiń óner kórsetetini jáne sol komandalardyń múmkindigi qandaı ekeni jaıynda biz joǵaryda áńgimeledik. Al aıtýly jarystyń «A» tobynda Kanada, Shvesııa, Chehııa, Shveısarııa, Slovakııa, Danııa, Belarýs jáne Ulybrıtanııa quramalary baq synaıdy.

Sońǵy jańalyqtar

Uqsas jańalyqtar