Bolashaq kásipkerlermen arnaıy komıssııa músheleri Mańǵystaý oblysy «Atameken» kásipkerler palatasynda kezdesti. Solardyń biri- Janar Ybyraeva. Ol úsh balanyń anasy. Uzaq jyldar jumyssyzdar qatarynda. Ortalyqtan shalǵaı ornalasqan Aqshymyraý aýylynda 200 tútin bar. Shaǵyn aýyldan jumys tabý ońaı emes. Sondyqtan da ol shaǵyn kondıter sehyn ashýdy josparlaıdy. Aýylda táttiler pisiretin birde-bir kásipker joq. Qazir úıde tapsyrys qabyldap júr. Grant arqyly alatyn 250 myń teńgege zamanaýı elektr peshi, mıkser, tátti toqashtardyń qalyptary syndy qural-jabdyqtar almaqshy. Janar «Bastaý» jobasynyń túlegi.
Al, Janar Qarasaeva Shetpe aýylynan tigin sheberhanasyn ashqysy keledi. Kórpe-tósek tigýdi bala kezden ádet qylǵan ana endi ony kásip kózine aınaldyrǵysy keledi. Gúljıhan Amanǵalıeva bolsa, Shetpe aýylynan sulýlyq salonyn ashýdy josparlaıdy. Ǵımaratty jalǵa alyp, bir adamdy jumyspen qamtý oıynda bar. Bet boıaý kásibimen bir aptada 16 adamdy, aıyna shamamen 65 áıel qabyldap, 100 myń teńgeden astam tabys tabatynyna senimdi. Aqtaýlyq Janerke Qurmetqyzy foto-vıdeo qyzmetin usynbaqshy. 250 myń teńgege montaj jasaý úshin asa qajetti noýtbýk, jady kartalaryn alady. Eki balanyń anasy perzenthanadan shyǵarý sátinen beıne-foto estelikterin kásipke aınaldyrmaq.
-Qazir adamdardyń talǵamy ózgerdi. Náresteniń dúnıege kelý sátinen bastap vıdeoǵa túsirýge tapsyrys berip jatady. Sodan úıine shyqqanǵa deıingi aralyqtan foto-vıdeo toptama jasaımyn. Munan basqa Mańǵystaýdaǵy týrızm baǵytyn estelikke qaldyrǵym keledi. Týrısterdi óńirdegi nebir ádemi jerlerge saıahatqa aparyp, áýlıeli oryndardan qaıtalanbas kadrlar jasaýǵa bolady, deıdi fotograf qyz.
Komıssııa tóraǵasy Serik Gýsman: «Búgingi komıssııa otyrysynda qaralǵan 5 jumyssyzdyń da jobalary maquldandy. Otbasyna nápaqa taýyp, kásip bastasa úlken istiń bitkeni. «Bastaý» jobasymen bilim alǵan beseý shaǵyn bıznestiń damýyna at salysatyn bolady. Árqaısysyna beriletin 250 myń teńge qaıda jumsaldy? Olardyń alǵan qural-jabdyqtary jasaǵan kásipteri bir jyl boıy tekserilip otyrady. «Atameken» kásipkerler palatasy áleýmettik jaǵdaıy az qamtylǵan jandardyń aıaqqa turyp ketýine úlken múmkindik jasap otyr, deıdi.
