Biraq halyqtyń qyraǵy nazary qanshalyqty qadaǵalaǵanymen teńizdi qoldan búldirýshiler de aıylyn jııatyn emes. Teńizden zańsyz balyq aýlaýshylar, ózge de zııandy áreketter óz aldyna, las sý tógý jaǵdaıynyń qaıtalanýy aqylǵa syımaıdy. Jýyrda Aqtaý qalasynyń 1-shaǵyn aýdan tusyndaǵy jaǵalaýǵa las sý tógilip, tıisti oryndar kináli mekemeni izdep tapqan edi. Las sýdyń quramynda nıkel, marganes pen mys syndy densaýlyqqa jáne qorshaǵan ortaǵa zııandy elementter mólsheriniń kóp ekendigi anyqtaldy. Kináli mekeme teńizge zııan keltirgeni úshin 1,7 mln teńge aıyppul arqalaǵan edi.
Bul joly jaǵymsyz jaǵdaı taǵy qaıtalandy. Sap-sary sý qalanyń 1-shaǵyn aýdany tusyndaǵy jaǵalaýǵa kanal arqyly quıylǵan.
Mańǵystaý oblystyq ekologııa departamenti qyzmetkerleri teńiz jaǵasyna baryp, sýdyń synamasyn aldy, ázirge onyń qorytyndysy anyqtalǵan joq. Las sý quramyndaǵy zııandylyq mólsheri de, ony kók teńizge tókkender de anyqtalyp, aıyppul salynar. Biraq myńdaǵan turǵynnyń aýyz sýyna aınalǵan, onsyz da ekologııalyq ahýaly alańdatarlyq kók teńizdi qoldan lastaý qaskóılik emeı nemene?! Bile tura qoldan búldirýdi qasaqana jasaý deýden basqa amal joq. Sonda bulaı tabıǵatty búldire berý qashanǵa deıin jalǵasady?
Mańǵystaý oblysy
