Is-sharaǵa Belarýs, Reseı, Armenııa, О́zbekstan, Tájikstan, Túrikmenstan, Ýkraına, Qyrǵyzstan, Ázerbaıjan, Grýzııa memleketteriniń Qazaqstandaǵy Tótenshe jáne ókiletti elshileri, sondaı-aq Lıtvanyń Qazaqstandaǵy úshinshi hatshysy qatysty.
Jıynda Janseıit Túımebaev aldymen alqaly top aldynda jaqynda Qazaqstan Prezıdenti bolyp saılanǵan Qasym-Jomart Toqaevtyń memleketter arasyndaǵy yntymaqtastyqty damytýǵa jańa serpin beretinine senim bildirdi.
– Qazaqstan túrli salada bizdiń elderimizdiń qarym-qatynasyn nyǵaıtýǵa basa mán beredi. Eýrazııalyq ekonomıkalyq odaqtyń sheńberinde barlyq baǵyt boıynsha ekijaqty jáne kópjaqty áriptestik belsendi damýda. Qazaqstan halqy Assambleıasynyń 29 sáýirde ótken XXVII sessııasynda Syrtqy ister mınıstrligimen birge atqarylatyn syrtqy saıası mindetter belgilendi. Onyń alǵashqysy – QHA Kásipkerler assosıasııasy arqyly sheteldik ınvestorlarmen ekonomıkalyq yntymaqtastyqty keńeıtý. Ekinshi tapsyrma – iskerlik baılanysty kúsheıtý jáne elge ınvestısııa tartý úshin QHA-nyń sheteldik dostary klýbyn qurý, – dedi J.Túımebaev.
Sóıtip jınalǵan qaýym atalǵan klýbty qurý máselelerin talqylady. J.Túımebaev onyń birneshe tıimdi jaqtaryn aıtyp berdi.
– Qazaqstan kóptegen elmen dostyq qarym-qatynasyn saqtap, túrli salada áriptestik ornatqan. Onyń ishinde ekonomıkalyq baılanysty bólek aıtýǵa bolady. Shetel azamattary munda kelgende aldymen ózderimen týys etnostar ornalasqan aımaqtarǵa barady jáne óz bıznesterin de asha bastaıdy. Mysaly, sheteldikterge ınvestısııalyq tartymdy óńir retinde Túrkistan oblysyn aıtar edim. Qazir ázerbaıjan kásipkerleri osy aımaqqa jıi-jıi atbasyn buryp, túrli bıznes-jobalardy júzege asyrý jaıyn qarastyrýda. Bul turǵyda Assambleıanyń sheteldik dostary klýbyn qurý týraly bastama mańyzdy ról atqarady. Sondyqtan osy sharýanyń jaı-japsary, tıimdiligi jóninde jan-jaqty pikir almasqanymyz durys, – dedi Ázerbaıjannyń Qazaqstandaǵy Tótenshe jáne ókiletti elshisi Rashad Mammadov.
Sonymen qatar basqosý barysynda Belarýs elshisi Anatolıı Nıchkasov, О́zbekstan elshisi Saıdıkram Nııazhodjaev jáne Ýkraına elshisi Ivan Kýleba Qazaqstan halqy Assambleıasynyń memleketter arasyndaǵy ekonomıkalyq baılanysyn nyǵaıtýǵa qosyp jatqan úlesi týraly pikirlerin jetkizdi. Buǵan qosa Assambleıa janynan qurylatyn sheteldik dostar klýbynyń jumysyn keńinen talqylady.
