Mundaı oqıǵalar kezinde sol mańaıǵa kezdeısoq tap bolǵan azamattardyń qurbandardy qutqarýda aıanyp qalmasy anyq. Solaı etýde de...
Osyndaı syn saǵattarynda alǵashqy medısınalyq kómek álippesin, kelissózderdiń qupııasyn meńgergen, bilek kúshteri bileýlengen, ustamdylyq qasıetterin boıyna sińirgen polısııa qyzmetkerleriniń eńbegin erekshelep aıtýǵa bolady. Ásirese sońǵy kezderi halqymyzǵa múldem jat qubylys – óz-ózine qol jumsaýǵa bekingen jandardy qutqaryp qalýda ishki ister salasynyń ókilderi az eńbek sińirip jatqan joq.
Osy sózimizdi naqty derektermen tuzdyqtasaq, jýyrda Aqtóbe temir jol stansasy mańaıyn josparly sholý barysynda jelilik polısııa bóliminiń qyzmetkerleri Shyńǵys Qambarbekov jáne Janserik Shaýtenov ótpeli kópirden sekirýge oqtalyp turǵan qyzdy baıqaıdy. Aqyryn jaqyndap, jyly sózben, sýısıd jasaýǵa bekingen qyzdy raıynan qaıtarýǵa polıseıler baryn salady. Sóıtip jasy jıyrma ekige endi tolǵan qyz polıseılerdiń sheber psıhologııalyq «shabýylynyń» arqasynda ajaldan aman qaldy. Qutqarylǵan qyzǵa odan ári Aqtóbe vokzalynda kásibı psıhologtar kómek kórsetti.
Al Pavlodarda jubaıymen renjisip, kózin jasqa bulaǵan 32 jastaǵy kelinshek ómirimen qosh aıtyspaq bolyp, Ertis ózeniniń jaǵalaýynan bir-aq shyqqan. Ashy sýdyń býymen ashýyna tótep bere almaǵan bul beıbaq is nasyrǵa shapqan jaǵdaıda artynda úsh balasynyń zar ılep qalatyndyǵyn da oılamasa kerek. Kóretin jaryǵy taýsylmasa kerek, býyrqanǵan ózenniń ústindegi kópirde kóz jasyn soradaı aǵyzyp turǵan kelinshekti baıqaǵan avtokólik júrgizýshileri bul jaıtty «Rýbej» baqylaý beketinde kezekshilik atqaryp turǵan polıseılerge habarlaıdy. Dereý oqıǵa ornyna jetken kishi leıtenant Erbol Aıǵojın kelinshekti jyly sózderimen jubatyp, aldaýsyratyp turyp janyna taıaǵan sátte kópirdiń erneýinde turǵan jerinen moınynan qushaqtaı alyp jerge túsirip úlgergen.
Soltústikqazaqstandyq polısııa departamentiniń qyzmetkeri kishi serjant Denıs Komarovtyń jeksenbilik keshtegi kezekshilikteriniń biri uzaq ýaqyt esinde qalary anyq. Qyzyljardaǵy «Jeńis saıabaǵynyń» aýmaǵynda quqyqtyq tártiptiń saqtalýyn qadaǵalap júrgen polıseı sol mańaıdaǵy oryndyqtardyń birine uıaly telefonyn qaldyra sala, Esil ózenine qaraı súrine-qabyna júgirgen qyzdy baıqap qalady. Aıaǵyn jyldamyraq basyp, beıtanys boıjetkenniń telefonyn ala sala sońynan júgirgen Denıs bıiktigi 25-30 metr jarqabaqtan sekirmek bolyp turǵan qyzdy kórgende oıy san-saqqa júgirdi. Mindet – beıtanys jandy ajaldan arashalaý. Kásibı daǵdy boıynsha: «Toqtańyz! Sizdiń ápke, inilerińiz bar ma? Olar jaıly oılańyz...», dep qyzdy áńgimege tartyp, raıynan qaıtaryp, jaqyn kelmek bolady. Biraq jaǵalaýdaǵy qyz polıseıge jaqyndamaýdy buıyryp, alǵan betinen qaıtpaýǵa bekingen. D.Komarov qolyndaǵy rasııamen aqyryn sóılep, áriptesterin kómekke shaqyrǵan. Ony jubanysh sózderimen alańdata otyryp, qasyna taıaǵan sátte qolynan shap berip ustap, qaýipsiz jerge alyp shyǵady.
Al Qyzylorda qalalyq polısııa basqarmasynyń ýchaskelik polısııa qyzmetkerleri Jasulan Sarbalaev pen Baýyrjan Aldabergen «102» telefonyna «Shuǵyla» shaǵyn aýdanynda ashyq tereze jaqtaýynda 2-3 jastaǵy baldyrǵannyń otyrǵany týraly habarlamadan soń oqıǵa ornyna shuǵyl jetedi.
Aıtsa aıtqandaı, ashyq tereze aldynda qapersiz otyrǵan bala qaýipti sezetin jasta emes eken. Oılanýǵa ýaqyt tapshy. J.Sarbalaev terezege jaqyn tartylǵan gaz qubyryna órmelep shyǵyp, balanyń tusyna kelgen sátte ony páterge qaraı ıterip qulatady. Árıne polıseıdiń fızıkalyq daıarlyǵynyń paıdasy da osyndaıda tıedi. Is ońtaıly sheshilgennen keıin B.Aldabergen kórshi-kólemdi aralap, úı ıelerin izdeýge kirisedi. Sóıtse baldyrǵannyń anasy jumysta, al ákesi dúkenge shyǵyp ketken eken.
Polısııa qyzmetkerleriniń órttiń kezindegi kózsiz erlikteri de buqaralyq aqparat quraldarynda jıi jarııalanyp turady. Sońy qýanyshqa ulasqan mundaı oqıǵalar kezindegi shuǵyl sheshimder men qutqarý operasııalary sanaýly mınýttarda júzege asyrylady.
Al polısııa qyzmetkerleri demalys kezin aıtpaǵanda, zeınetkerlikke shyqqan soń da antynan taımaıdy. Aıtalyq taıaýda Shýche qalasynda turatyn ishki ister salasynyń ardageri Erjan Arǵymbaev túngi saǵat úshtiń shamasynda kórshi úıden býdaqtap shyqqan tútindi baıqaıdy. Sanaýly mınýttar ishinde qyzyl jalyn sharpı bastaǵan úıge jetip esigin qaqqanymen eshkim esik ashpaıdy. Sodan bet sharpyǵan jalynǵa qaramastan, terezeni syndyryp ishke kirip, kózge túrtkisiz qarańǵyda, qannen-qapersiz uıyqtap jatqan egde jastaǵy eki adamdy syrtqa alyp shyǵyp úlgergen.
Batyrymyz kóliktegi polısııa departamentinde 20 jyldan asa eńbek etip, Makınka stansasynyń jelilik polısııa bóliminiń bastyǵy laýazymynan qurmetti eńbek demalysyna shyqqan jan bolatyn.
Mine, kóp oqıǵalardyń ishinen bul derekterdi súzip alǵandaǵy maqsat bireý – erlik isterdi úlgi qylý, ajaldyń aıtyp kelmeıtinin, qaýip-qaterdiń tosynnan bolatynyn eske salý. Árıne polısııanyń shymyr jigitteriniń eńbekteri eren, olardyń aldy memlekettik nagradalar da ıelendi, biraq qutqarýshylar óz isterin erlikke balamaıdy, bastysy – adamdardyń amandyǵy.
