«Nur Otan» partııasy Almaty qalalyq fılıaly Saıası keńesiniń múshesi, Qazaqstan joǵarǵy oqý oryndary assosıasııasynyń Bas dırektory Borıs Japarov saılaý nátıjeleri Qazaqstannyń ishki turaqtylyǵyn qamtamasyz etetin negizgi faktor ekenin atap ótip, beıbitshilik pen kelisim saltanat qurǵan qoǵamnyń ereksheligine toqtaldy. - Jańa tarıhı kezeńniń bastaýy bolǵan bul mańyzdy saılaýǵa barlyq partııalar men qoǵamdyq uıymdar ózderiniń laıyqty úlesterin qosty. El taǵdyryn aıqyndaǵan saıası máselede halqymyz óziniń joǵary saıası mádenıeti men órkenıettiligin tanytty», - dedi óz sózinde Borıs Japarov.
Koalısııa músheleri tıimdi dıalog pen túrli saıası kúshterdiń ózara qarym-qatynasynyń modeline aınalyp úlgergen dástúrli otyrysta el damýynyń ózekti máselelerin kóterdi. «Aq jol» demokratııalyq partııasy Almaty qalalyq fılıalynyń tóraǵasy Nurlan Jazylbekov halqymyzdyń tatýlyǵy, yntymaǵy, birligi sııaqty demokratııalyq qundylyqtar barsha qazaqstandyqtardyń ortaq rýhanı jetistigi ekendigine toqtalyp, elimizde azamattyq qoǵamdy damytý jolynda jasalyp jatqan mańyzdy qadamdardyń jalǵasy retinde Prezıdent bastamasymen qurylǵan Ulttyq qoǵamdyq senim keńesi aldaǵy ýaqytta el damýyna jańa serpin beretindigin atap ótti.
О́z kezeginde «Aýyl» halyqtyq-demokratııalyq patrıottyq partııasy Almaty qalalyq fılıalynyń tóraǵasy Abdýlla Saparov el damýyna baǵyttalǵan naqty baǵdarymyzda birlesken kúsh-jigerdiń qajettigine nazar aýdarsa, Qazaqstan Kommýnıstik halyq partııasy Almaty qalalyq komıtetiniń ekinshi hatshysy Leıla Tóleýǵalıeva, «Nur Otan» partııasy Almaty qalalyq máslıhatyndaǵy depýtattyq fraksııasy basshysynyń orynbasary Roza Badaeva, Aýǵan soǵysy ardagerleri men aýǵan soǵysy múgedekteri qoǵamdyq birlestikteriniń Úılestirý keńesiniń tóraǵasy Murat Abdýshýkýrov qoǵamnyń belsendiligi men uıymshyldyǵy el damýyna serpin beretindigine toqtaldy.
