Qazaqstan halqy Assambleıasy ǵımaratynda ótken is-sharaǵa Mańǵystaý oblystyq sotynyń sýdıasy, tatýlasý rásimderi boıynsha úılestirýshisi Murat Aýbakırov jáne sýdıa-medıator Janar Nýrýshova, kásibı medıator Sanııa Satalıeva qatysty.
Ashyq esik kúninde sóz alǵan Murat Aýbakırov qoǵamda daýdy azaıtý, halyqty áýre-sarsańǵa salmaý jáne sottardyń jumysyn izgilendirý maqsatynda sot-quqyq salasynda júrgizilgen reformalar óz nátıjesin berip, sotqa túsetin ister sany azaıyp otyrǵanyn tilge tıek etti. Nátıjesinde, aǵymdaǵy jyly Respýblıka sottarynda sáýir aıynda 551 myń is pen materıaldar tússe, mamyr aıynda nebary 129 myń túskenin, bul tórt esege jýyq isterdiń tómendeýi ásirese azamattyq daýlar sanynyń azaıýynan baıqalatyndyǵyn atap ótti.
Ashyq esik kúnine qatysýshylar tarapynan qoıylǵan suraqtardyń deni azamattyq-quqyqtyq retteý máseleleri, alıment tóleý, eńbek zańnamasynyń buzylýy jáne taǵy basqa taqyrypta boldy. Árbir qoıylǵan suraqqa zańdy túsindire otyryp, tolyq jaýap berildi.
Is-shara sońynda sot, ákimdik ǵımarattarynda medıator kabınetteri ashylǵandyǵy, «Atameken» kásipkerler palatasy óńirlik fılıalynda, Kásipodaqtar úıinde, Sh.Esenov atyndaǵy memlekettik ýnıversıtette tatýlasý ortalyqtary jumys isteıtindigi, oblysta Bıler keńesi qurylyp, alǵashqy daýlar qaralǵandyǵy týraly qundy aqparattar aıtyldy.
Eń bastysy, tatýlasý taraptardyń ýaqyty men qarjysyn únemdeıtindigi, taraptar memlekettik bajdan bosatylatyndyǵy qatysýshylar nazaryna usynyldy.
Mańǵystaý oblysy
