«Medısınalyq poıyzdar» jobasy óz jumysyn 29 sáýirde bastady. Almaty, Shyǵys Qazaqstan jáne Pavlodar oblystarynyń shalǵaı beketteri turǵyndaryna qyzmet kórsetken poıyz Aqmola óńirine turaqtady.
Keń aýqymdy áleýmettik joba 2010 jyldan bastap «Qazaqstan temir joly» ulttyq kompanııasy» AQ jáne Densaýlyq saqtaý mınıstrligimen, 2016 jyldan beri «Samruk-Kazyna Trust» qorymen júzege asyrylady.
Bıyl poıyz Qazaqstannyń 49 shalǵaı beketiniń jeti myńnan astam turǵynyna tegin medısınalyq kómek kórsetti. Onyń ishinde 1465 búldirshin dáriger qabyldaýynda boldy, 623 kishi hırýrgııalyq ota, 283 fıbroezofagogastrodýodenoskopııa (FGDS) prosedýrasy men 2416 ýltradybystyq zertteý (ÝDZ) jasaldy.
Poıyz sapaly ári jedel dıagnostıka jasaýǵa múmkindik beretin zamanaýı medısınalyq quraldarmen jabdyqtalǵan. Poıyzǵa toǵyz vagon tirkelgen, onyń tórteýi pasıentterdi qabyldaýǵa arnalǵan.
Áleýmettik jobanyń aýqymy osy jyly keńeıgen. Bul jaıynda «Samruk-Kazyna Trust» Áleýmettik jobalardy damytý qory bas dırektorynyń orynbasary Ásel Shildebaeva:
– О́tken jyly 124 shalǵaı bekette turatyn 40 000-nan astam turǵyn tekserildi. Bıylǵy jyly biz baratyn oblystardyń sanyn arttyrdyq. Eger bir jyl buryn poıyz 9 oblystyń ǵana turǵyndaryn tekserse, onda bıylǵy maýsymda dárigerler brıgadasy 21 jeltoqsanǵa deıin jolda bolyp, Qazaqstannyń 14 oblysynyń 195 beketin qamtıtyn bolady. 60 000-nan astam adamdy qamtý josparlanǵan, – dedi.
Joba úshin 14 medısınalyq brıgada jasaqtalǵan. Ár oblysqa barǵan saıyn, dárigerler aýysyp otyrady. Bıyl mamandar quramyna S.J.Asfendııarov atyndaǵy QazUMÝ professorlary qosylǵan. Dárigerler stansııa turǵyndary aýrýlaryn erterek anyqtap, emdelýge baǵyt-baǵdar beredi. Almaty, Shyǵys Qazaqstan jáne Pavlodar oblystary emdelýshileriniń arasynan onkologııalyq aýrýlar, qant dıabeti men gepatıt kóp anyqtalǵan.
Eltaı stansııasynyń turǵyny, zeınettegi kópbalaly ana Qýanysh Gúlzat poıyzdyń aýylǵa kelip toqtaǵanyna rızalyǵyn bildirdi, aýylda keıbir mamandardyń joqtyǵy qıyndyq týǵyzatynyn aıtty.
«Densaýlyq» poıyzy 26 maýsymǵa deıin Aqmola oblysynda bolady. Odan ári Soltústik Qazaqstan, Qostanaı, Qaraǵandy oblystaryna jol tartady. Qazaqstannyń batys aımaqtaryna da tegin qyzmet kórsetip, óz jumysyn Jambyl oblysynda aıaqtaıdy. Poıyzdyń júrip ótetin jalpy joly 19 myń shaqyrymnan asady.
Ásem TAŃATAR,
EUÝ-dyń jýrnalıstıka fakýlteti stýdenti
