Memleket basshysy Qasym-Jomart Toqaev konferensııada sóılegen sózinde táýelsiz Qazaqstannyń tarıhy, shyn máninde, memleketimizdiń negizin qalaýshy Tuńǵysh Prezıdent Nursultan Ábishuly Nazarbaevtyń kóshbasshylyq tarıhy ekenin atap ótti.
– Bul jaı ǵana mereıtoılyq data emes, «qazaqstandyq damý» jolyn anyqtaǵan el tarıhyndaǵy asa mańyzdy kezeń boldy, – dedi Qazaqstan Prezıdenti.
Qasym-Jomart Toqaev Elbasynyń basshylyǵymen postkeńestik keńistikte eń tabysty memlekettik qurylys jobasy júzege asyrylǵanyn sheteldik sarapshylardyń moıyndaıtynyn aıtty. Baıandamada aıtylǵandaı, ınflıasııanyń sharyqtaǵan, kásiporyndardyń jumysy toqtaǵan, taýarlardyń jappaı tapshylyǵy kúsheıgen kezdegi postkeńestik ekonomıkanyń qırandysynyń ornyna álemniń eń damyǵan 50 eliniń qataryna qosylǵan kúshti memleket quryldy.
Memleket basshysy qazirgi halyqaralyq qatynastardyń negizgi faktorlaryna aınalǵan Azııadaǵy ózara yqpaldastyq jáne senim sharalary keńesi, Álemdik jáne dástúrli dinder kóshbasshylarynyń sezi, Táýelsiz memleketter dostastyǵy, Shanhaı yntymaqtastyq uıymy, Eýrazııalyq ekonomıkalyq odaqtyń qurylýy sııaqty Elbasynyń syrtqy saıasattaǵy bastamalaryna jan-jaqty toqtaldy.
– Qazaqstan orasan zor ıadrolyq qarýdan óz erkimen bas tartyp, Jer betindegi iri ıadrolyq polıgondardyń birin japty. Elbasy álemdik dıplomatııa tarıhyna jahandyq ıadrolyq qarýǵa qarsy qozǵalystyń kóshbasshysy retinde endi. Tuńǵysh Prezıdent qana Qazaqstannyń astanasynda Eýropadaǵy qaýipsizdik jáne yntymaqtastyq uıymynyń ázirge osy myńjyldyqtaǵy alǵashqy ári jalǵyz sammıtin ótkizip, eýrazııalyq qaýipsizdik deklarasııasyn qabyldady. Elbasy álemniń eń bıik minberlerinen halyqaralyq qatynastardy túbegeıli reformalaýǵa baǵyttalǵan usynystaryn jetkizdi, – dedi Qasym-Jomart Toqaev.
Memleket basshysy sóziniń sońynda Qazaqstannyń Tuńǵysh Prezıdenti sanaly ǵumyryn halqyna qyzmet etýge arnaǵan eliniń adal perzenti ári jahandyq deńgeıdegi saıasatker ekenin atap ótti.
Konferensııa qatysýshylardyń aldynda sonymen qatar Qazaqstannyń Tuńǵysh Prezıdenti – Elbasy Nursultan Nazarbaev ta sóıledi.
Halyqaralyq konferensııanyń plenarlyq otyrysyna «Jańarý» jemqorlyqqa qarsy jalpyulttyq qozǵalysynyń jetekshisi, Demokratııalyq kúshterdiń jalpyulttyq koalısııasynyń múshesi Oralbaı Ábdikárimov, Reseı ǵylym akademııasynyń Jalpy tarıh ınstıtýtynyń dırektory Mıhaıl Lıpkın, QR Parlament Májilisiniń depýtaty Qýanysh Sultanov, Shanhaı qoǵamdyq ǵylym akademııasynyń Reseı jáne Ortalyq Azııa zertteý ortalyǵynyń dırektory Daveı Pan, О́zbekstan Prezıdenti janyndaǵy strategııalar jáne aımaqaralyq zertteýler ınstıtýtynyń dırektory Eldor Tahırov, Qyrǵyz Respýblıkasynyń eks-Memlekettik hatshysy Osmanqun Ibraımov, Amerıkalyq saıasattanýshy jáne jýrnalıst Arıel Koen, Ázirbaıjan Respýblıkasynyń Mıllı Májilisiniń depýtaty, Ázerbaıjan memlekettik basqarý akademııasynyń janyndaǵy saıası zertteýler ınstıtýtynyń dırektory Elman Nasırov, «Valdaı» halyqaralyq pikirtalas klýbynyń baǵdarlamalyq dırektory, Reseı SIM Máskeý memlekettik halyqaralyq qatynastar ınstıtýtynyń (MGIMO) halyqaralyq zertteýler ınstıtýtynyń dırektory Andreı Sýshensov, Memleket jáne qoǵam qaıratkeri Ravıl Cherdabaev qatysty.
