Kitaphanashylardy tolǵandyrǵan máselelerdi tyńdaýǵa QR Mádenıet jáne sport mınıstrligi Jaýapty hatshysynyń mindetin atqarýshy, zań departamentiniń dırektory Kúmis Seıitova arnaıy qatysyp, zamanaýı kitaphanalar talaptaryn tyńdady.
Sharany júrgizgen Ulttyq kitapxanasynyń dırektory Baqytjamal Ospanova elimizdegi kitapxana isiniń jaǵdaıy týraly baıandama oqydy. Kóp salaly, kóp deńgeıli áleýmettik ınstıtýt retinde Qazaqstan kitaphanalarynyń memleket ómirindegi róline toqtalǵan dırektor memlekettik baǵdarlamalardy júzege asyrýdaǵy birqatar sharalardy atap ótti. Búginde respýblıka boıynsha kitaphanalardyń sany 11 myńnan asady. Jalpy kitaphana qory– 333 mln. 218 myń 902. Oqyrmandar sany – 8 mln. 627 myń 524 bolsa, kitaphana mamandarynyń sany – 19 myńnan asady. Qazirgi zamanǵy kitaphanalardaǵy jaǵdaıdy saraptaı kele Baqytjamal Ospanova elimizdiń tarıhı-mádenı murasyn saqtaýdaǵy jumystardyń jandanyp kele jatqandyǵyn jetkizip, kitaphanalyq-aqparattyq qyzmette ınnovasııalyq ádisterdi engizý, oqyrmandardy áleýmettik mańyzdy aqparattarmen qamtamasyz etýdiń zamanaýı múmkindikterine toqtaldy.
Mádenıet jáne sport mınıstrligi Jaýapty hatshysynyń mindetin atqarýshy, zań departamentiniń dırektory Kúmis Seıitova oblys pen jetekshi qalalardan kelgen kitapxana basshylarynyń kókeıkesti suraqtaryna jaýap berip, aldaǵy ýaqytta kitapxana salasyn damytý maqsatynda qandaı ister atqarý kerektigin talqylady.
«Kitaphanashylardy tolǵandyrǵan kóptegen máselelerdi talqylaýǵa jınalyp otyrmyz» degen Ulttyq kitaphana dırektorynyń orynbasary Ajar Iýsýpova búginde kitaphanalar jumysyn jańyrtý, biryńǵaı kitaphana qaýymdastyǵyna birigý, elektrondy kitaphana qoryn tolyqtyrý maqsatynda sıfrlandyrýdy damytý máselesimen qatar búginde kitaphanashy mamandyǵynyń eskirip bara jatqandyǵyn negizge aldy. Qazirgi kezde kitaphanashylardyń deni 40-50 jastan joǵary mamandar.Sondyqtan da kitaphanaǵa jastardy tartý máselesi óte ózekti. «Búginde «Mádenıet týraly» zańǵa ózgerister men tolyqtyrýlar engizilýde. Sonymen qatar kitaphana isiniń tujyrymdamasy ázirlenýde. Osy qujatta kitaphanaǵa qatysty barlyq máseleler qamtylǵan. Sala qalaı damıdy, strategııasy, mańyzy men mindetteri barlyǵy osy qujatqa engizilgen. Osyǵan baılanysty birqatar otyrystar ótti, kitaphana mamandary óz usynystaryn jetkizdi. Búginde zamanaýı kitaphanalardyń talaptary zaman talabyna qaraı ózgerip keledi, sondyqtan da kitaphana kitap qory retinde ǵana emes, áleýmettik sıpaty basym ınstıtýt baǵytynda damýy qajet» dep atap ótti óz sózinde Ajar Hamıtqyzy.
«Sıfrlandyrý qoǵamynda ómir súrip otyrǵandyqtan kitaphanalar qaýymdastyǵynyń birigip jumys isteýi mańyzdy. Árbir aımaq ózindik erekshelikterin, qundylyqtaryn sandyq nusqaǵa aýdarýy kerek, uly esimderdi anyqtaýda sandyq júıeniń artyqshylyqtaryn paıdalaný kerek»,- deıdi Shyǵys Qazaqstan oblystyq Pýshkın atyndaǵy kitaphana dırektorynyń mindetin atqarýshy Bıbigúl Shagıeva. Kitaphana qyzmetin jetildirýde zamanaýı tehnologııalardyń áleýeti zor ekendigin aıtqan Bıbigúl Shagıeva aımaqtarda kásibı skanerlerdiń jetkiliksizdigin alǵa tartyp, uıaly telefondar arqyly kitaphana qyzmetin paıdalaný tetikterin jetildirýdiń, ıaǵnı onlaın kitaphanalardy damytý máselesin, sonymen «Kitaphana astanasy» jobasyn jańǵyrtý jumystaryn jolǵa qoıý týraly usynysyn bildirdi.
Al Batys Qazaqstan oblystyq balalar jáne jasóspirimder kitaphanasynyń dırektory Zyvaıda О́teshova búginde balalarǵa qajetti kitaptardyń jetkiliksiz ekendigin aıtady. Aýdarma kitaptardyń aımaqtarǵa jetýi men sapasyna alańdaýshylyǵyn bildirgen kitaphana mamany balalar úshin qazaq tilinde qııal-ǵajaıyp, ǵylymı-kópshilik kitaptarǵa suranys joǵary deıdi.
Kezdesýde kitaphana isi salasyndaǵy quqyqtyq máseleler, Qazaqstandyq Kitaphanalyq Odaq qyzmetin uıymdastyrý, kásibı kitaphanalyq bilim berý jáne Kitaphana kadrlaryn sertıfıkattaý ortalyǵyn qurý problemalary, «Kitap jáne kitaphana» jýrnalynyń damý perspektıvalary, Balalar men jasóspirimder kitapxanalarynyń, Bilim jáne ǵylym kitapxanalarynyń, WEB-RABIS jáne QazUEK máseleler boıynsha baıandamalar oqylyp, ózara pikir almasty.
Jıyn barysynda Qazaqstandyq kitapxanalar odaǵynyń tóraıymy bolyp Ulttyq kitapxanasynyń dırektory Baqytjamal Ospanova taǵaıyndalyp, odaq quramyn saılady. Sonymen qatar, «Oqyrmany ozyq ólke» baıqaýynda 2018 jyldyń qortyndysy boıynsha S.Muqanov atyndaǵy Soltústik Qazaqstan oblystyq ámbebap ǵylymı kitapxanasy úzdik tanylyp, marapattaldy.
Sharaǵa ulttyq, respýblıkalyq kitaphanalardyń, oblystyq ámbebap, qalalar men aýdandardyń ortalyqtandyrylǵan kitaphanalar júıeleriniń, balalar jáne jasóspirimder kitaphanalarynyń, JOO kitaphanalarynyń jáne JOO kitaphanalary qaýymdastyǵynyń, óńirlik mádenıet basqarmalarynyń basshylary, «Atameken» UKP ókilderi jáne BAQ ókilderi qatysty.
ALMATY
