Bıyl da Tatar halqynyń ulttyq merekesi Sabantoı oblystyq deńgeıde erekshe atalyp ótilip, oǵan oblys ákiminiń orynbasary Ásem Núsúpova, О́skemendegi Dostyq úıi-Qoǵamdyq kelisim ortalyǵynyń dırektory Eldar Tóleýbekov, Semeı qalasy ákimi Ermak Sálimovter qatysty. Sabantoıǵa oblystyń Besqaraǵaı, Borodýlıha aýdandarymen qatar Rekseıdiń Qazan qalasynan da tatar aǵaıyndar kelip qatysýda. Ataýly merekede tatar halqynyń án-jyrlary shyrqalyp, ulttyq oıyndarynan saıys ótti. Tatarstannyń eńbek sińirgen mádenıet qyzmetkeri, dańqty sportshy Rom Ilmatovtyń, eńbek ardageri Rashıda Ashrafqyzynyń aıtýynsha «Tatarcha kýrás» oıyndary babadan balaǵa mura bolyp kele jatqan oıyndar. Ulttyq oıyn demekshi, baǵanǵa órmelep, baǵan basyndaǵy syı-syıapatty alý keshke deıin jalǵasatyn sııaqty. Ázirshe eshkim de bıiktikke shyǵa almady. Sondaı-aq, demeýshi Rafaıl Hazıpovtyń uıymdastyrýymen tatar palaýy festıvali ótip, semeılikterdiń barlyǵy da dám tatty.
Reseı Federasııasynyń О́skemendegi Bas konsýldyǵynyń Attashesi Andreı Hanov, Tatarstannyń halyq ártisi Rezeda Týhvatýllına jáne halyqaralyq konkýrstar laýreaty Aleksandr Ignatevter Sabantoıdyń qurmetti qonaqtary boldy. Tatarstannyń Prezıdenti Rýstam Mınnahınovtyń Semeı tatarlaryna joldaǵan quttyqtaýyn Sabantoıda Qazannan kelgen tatar aǵaıyndar oqydy.
Semeıde ótip jatqan Sabantoıda Tatar ortalyǵynyń uıymdastyrýymen Ulttyq taǵam «Chak-chak»-ty eń tátti, dámdi ǵyp daıyndaǵandardyń arasynda konkýrs ótip, qorytyndysy shyǵaryldy. Ádilqazylar alqasy eń dámdi «chak-chakty» tańdady. Desek te, barlyq qatysýshylar joǵary marapattarǵa ıe boldy. Sebebi árkimdiki bolsyn taza eńbek ekeni kórinip tur.
Sharaǵa qatysqan oblys ákiminiń orynbasary Ásem Núsúpova on qolynan óner tamǵan aspaz kelinshek Dıana Izmaılova Gran-Prıdi, al taǵy bir tatardyń ónerli qyzy Fanııa Karımovaǵa birinshi oryndy tapsyrdy. Olarǵa tatar halqynyń ulttyq taǵamyn qasterlep, konkýrstyń erekshe deńgeıde ótýine atsalysqandyqtary úshin rızashylyǵyn bildirdi
Jıyn sońynda Semeıdegi Bıznes jáne servıs kolledjiniń stýdentteri Tatar ulttyq kıimderinen sán úlgisin kórsetti.
Raýshan NUǴMANBEKOVA
«Egemen Qazaqstan»
SEMEI
