Aıta ketý kerek, mundaı qoıma elimizdiń eki qalasynda – Almaty men Tarazda ǵana bar. Kásipker ony «Agrarlyq nesıe korporasııasy» AQ tarapynan berilgen qarajat esebinen turǵyzǵan. Saqtaý qoımasynyń syıymdylyǵy – 2000 tonna. Qazir munda saqtalyp turǵan ónimniń deni óńirdegi alma ósirýshilerge tıesili.
Qoımanyń zamanaýı jaraqtandyrylýynyń nátıjesinde jemis-jıdek ónimderi meılinshe babyna keltirilip, qysta da jasań kúıinde saqtalady. Árqaısysynyń tońazytatyn, ylǵal bóletin, aýyr zattardy boıyna sińirip alatyn erekshelikteri bar 12 kamera ónimdi buzbaı saqtaıdy. Qoıma etılen gazyn kómirqyshqyl gazymen almastyratyn qurylǵylarmen de jabdyqtalǵan. Ádette almadan etılen gazy bólinedi de arnaıy qurylǵy kómegimen kómirqyshqyl gazyna aınaldyrylady. Sonyń áserimen jemis «uıyqtaý rejimine» kóshiriledi, bul 7-8 aı boıy jalǵasady. Kásipkerdiń ózi turǵyzǵan saqtaý qoımasy arqyly jergilikti alma ónimderi bıyl aıtarlyqtaı tómen baǵamen satylyp jatqanyn da aıta ketken jón.
Kóshkinbaı Qulmanbetov aýmaǵy bir jarym gektarlyq saqtaý alańynda kókónis pen jemis-jıdek saqtaýmen shektelmeı, ony óńdeý isin qolǵa alýdy da oılastyrýda. Munda keptirilgen jemister, qalbyrlanǵan jáne untaq túrindegi jemis ónimderi shyǵarylmaq.
K.Qulmanbetov adam úshin eń paıdaly daǵdy – jergilikti jerde ósirilgen ekologııalyq taza azyq-túlik ónimderin paıdalaný ekenine senimdi.
– Bizde tutyný mádenıeti qalyptaspaı otyr. Barlyq aýrýlardyń emi, jalpy tirshiligimizdiń arqaýy – as. Turǵyndardyń densaýlyǵyn qorǵaıtyn basqa emes, ózimiz. Biz bolashaqta osy óńirde ósirilgen kókónis pen jemis-jıdek ónimderinen emdik, kosmetıkalyq dárýmender daıyndap, onyń kómegimen adamdardyń emdelýine aıtarlyqtaı kómegimizdi tıgize alamyz, – deıdi ol.
Seriktestiktiń basshysy osylaı kókónis pen jemis-jıdek ónimderine halyqtyń qysta da taryqpaı, dastarqandarynan jeńsik asty úzbeýine septesip otyr.
Baımahanbet AHMET,
jýrnalıst
TARAZ
