Ashyqtyqtyń artyqshylyǵy kóp

Alqaly jıynǵa Nur-Sul­tan, Almaty jáne Shymkent qala­lary, oblystar ákimdik­teriniń, sondaı-aq úkimet­tik emes uıymdar, IT-kompa­nııa­lar men buqaralyq aqparat qu­ral­darynyń ókilderi qa­tysty.

Aldymen Aqparat jáne qo­ǵamdyq damý mınıstri Dáý­ren Abaev sóz alyp, bul semınar-keńes memle­ket­tik organdardyń ashyq­ty­ǵyna jáne bılik pen qo­ǵam arasyndaǵy dıalogty nyǵaıtýǵa arnalǵanyn aıtty. Mınıstr jaqynda ótken Azamattyq forýmda elimizdiń Tuńǵysh Prezıdenti halyqpen keri baılanys ornatýdyń ja­ńa formattaryn izdestirýdi tapsyrǵanyn eske salyp, bul baǵytta tıimdi jumys is­teý úshin bilikti sarapshy­lardy, azamattyq qoǵam men BAQ ókilderin barynsha ju­myldyrý kerektigin atap ótti.

– Keri baılanysty kú­sheı­týde biz baǵdarlaıtyn úsh postýlat – barynsha qam­tý, ashyqtyq jáne jedel áreket etý. Búginde elimiz­diń óńirlerinde osy baǵyt­ta nátıjeli jumystar atqa­ry­lyp, oń tájirıbeler jınaq­taldy. Bul rette open akimat, Ikomek, «Halyqtyq baqylaý» jáne taǵy birqatar jobany ataýǵa bolady. Bulardy iske asyrýǵa halyqtyń jappaı gadjet qoldanýy, ınternet aıasynyń keńeıýi, barlyq salalardyń sıfrlanýy septigin tıgizdi. Qazir árbir oblys ákimdiginiń áleýmettik jelilerde paraqshalary bar, onda adamdar ózderiniń talap-tilekterin qaldyrady. Árıne, ashyqtyq pen jedeldiktiń ár aımaqta kórsetkishi ártúrli, degenmen barlyq óńir osy jumystyń mańyzdylyǵyn túsinip, onyń tıimdiligin arttyrýdy kózdeıdi. Jalpy, mundaı tájirıbe áleýmettik shıelenisti órshitpeýge ájep­táýir yqpal etetinin moıyn­damasqa lajyń joq. Son­dyqtan bul jıynnyń sessııa­larynyń birin IT-tehno­logııalardy qoldaný taqy­rybyna arnadyq, – dedi D.Abaev.

Buǵan qosa mınıstr aqpa­ratqa qoljetimdilik týraly zańdy iske asyrý týraly sóz qozǵady. Onyń aıtýynsha, bul tek memlekettik organdar men kompanııalardy ǵana emes, bıýdjet qarajatyn alatyn barlyq kvazımemlekettik sektor men jeke uıymdardy qamtıdy. Sondaı-aq BAQ týraly zańda alǵash ret baspasóz hatshylarynyń mártebesi kór­setilipti jáne olardyń deń­geıin departament dırektoryna deıin kóterý boıynsha jumys júrgizilip jatyr eken.

Respýblıkalyq semınar-keńes 4 baǵyt boıynsha paneldik sessııalarǵa bó­lin­di. Onyń alǵashqysy «BAQ halyqtan keri baılanys alý arnasy retinde» dep ataldy. Bul bólimniń moderato­ry «Internews Kazahstan» uıy­mynyń zańgeri Olga Dıdenko boldy. Ol sóz bostandyǵy jaıynda jan-jaqty pikirin bildirip, aqparat erkindigi týraly zań qabyldaǵan elderdiń qatary jyl saıyn artqanyn naqty derektermen kórsetti. Zańger búginde álem halqynyń teń jartysy ınternet paıdalanatynyna toqtalyp, soǵan sáıkes medıa-kontentke qoljetimdilik te keńeıgenin aıtty.

Al Ishki ister mınıstriniń orynbasary Alekseı Kalaı­chıdı elimizdegi eń úlken quqyq qorǵaý organynda úlken reforma júrip jat­qanyn, sonyń ishinde qo­ǵammen, BAQ-pen baılanysty nyǵaıtatyn jańa formattar qarastyrylyp jatqanyn jetkizdi. Onyń aıtýynsha, buryn ózara qarym-qatynas tek bas­pasóz hatshylarynyń má­lim­demesimen shektelse, búgin­de basshylardyń ózderi kabı­netterinen shyǵyp, halyq­pen betpe-bet kezdesip jatyr. Sonyń bir kórinisi – «Jolda qabyldaý» aksııa­sy. Osy is-shara arqyly azamattar aıyppuldarǵa, júrgizýshi quqyna, kóshi-qon zańnamasyna qatysty suraqtaryn qoıyp, oǵan tu­shymdy jaýap ala alǵan. Jal­py jylyna 17 mln memle­kettik qyzmet kórsetilipti. Son­daı-aq mınıstrliktiń ak­kaýntyna 650 myń adam ja­zylǵan eken.

Sonymen qatar «Ońtústik astana» TRK» AQ bas dırektory Bolat Qalıanbekov kúnine ınternetke halyqtyń 67%-y kirse, 72%-y teledıdar qaraıtynyn atap, mu­ny­men áleýmettik jelilermen salystyrǵanda BAQ áli de áleýetti ekenin málimdedi. Sóıtip ózderi qolǵa alǵan «Ákimmen ashyq áńgime» jobasy sátti bolǵanyn, halyqpen baılanysty kúsheıtkenin aıtyp berdi. Máselen, osy jobaǵa jergilikti jurt erekshe yqylas tanytyp, telearna saıty jáne WhatsApp jelisi arqyly ákimge mazalaǵan su­raqtaryn tikeleı joldaǵan. Nátıjesinde telearnanyń reıtıngi joǵarylap, saıtyna kirgen adamdardyń sany da kúrt ósipti.

Sondaı-aq bul keleli keńestiń ekinshi sessııasy JAO-nyń azamattarmen ózara is-qımyl quraldaryn qalyptastyrý kezinde erekshe qajettiligi bar adamdardyń muqtajdyqtaryn eskerýge arnaldy. Al úshinshi bóliminde keri baılanysta zamanaýı aqparattyq tehnologııalardy qoldaný jóni talqylansa, sońynan memlekettik qyzmet kórsetýlerdi jetildirý te­tikteri egjeı-tegjeıli baıandal­dy.