«Go Viral – bul AQSh-tyń Ortalyq Azııadaǵy ınnovasııany, kásipkerlikti jáne ekonomıkalyq múmkindikterdi keńeıtýdi, sondaı-aq óńirdiń jahandyq ekonomıkamen baılanysyn jaqsartýdy qoldaıtynynyń kóptegen mysalynyń biri», dep atap ótti AQSh-tyń Qazaqstandaǵy elshisi Ýılıam Mozer baspasóz máslıhatynda. Festıval shymyldyǵy QBTÝ rektory Kenjebek Ibrashev pen AQSh-tyń Almatydaǵy Bas konsýly Erık Maıermen jáne Qazaqstan Syrtqy ister mınıstrliginiń Almatydaǵy ókildiginiń basshysy Erlan Ysqaqovpen birge saltanatty túrde ashyldy. AQSh-tan, Ortalyq Azııa men Shyǵys Eýropadan kelgen jetekshi trendsetterler bıznes, kommýnıkasııa salasynda jahandyq aýdıtorııamen ózara is-qımyl jasaý týraly aqparattarymen bólisti. Bul salalyq keńistiktiń sońǵy jańalyqtarynan habardar etip, ózara tájirıbe almasýǵa múmkindik beredi.
Kim bolǵyńyz keledi? Maqsatyńyz qandaı? Muratqa jetý jolynda ne nársege nazar aýdarýyńyz tıis? Stenford ýnıversıtetiniń ómirlik dızaın baǵdarlamasynyń lektory Djon Armstrong alǵashqylardyń biri bolyp osy suraqtarǵa jaýap berdi. Kóp jyldan beri stýdentterge bilim berý, mansaptyq jáne jeke damý joldaryn tańdaýǵa kómektesetin ártúrli kýrstardy oqytyp júrgen mamannyń aıtýynsha, kez kelgen ómirlik máselelerge jaýap izdeýde dızaın-oılaý ádisterin utymdy qoldana bilgen durys. Djon qatysýshylarǵa «О́mir – ómir súrýge tatıtyn shyǵarmashylyqty qyzyq dúnıe» degen urandy ortaǵa tastady. Al Iаroslav Halıýlın VR jáne AR tehnologııalary kemeline jetken kúnderi, árqaısysy osy salada óz ornyn taba alatynyn aıtady. Mysaly, jobalaýshy nemese qurylysshy zamanaýı tehnologııalar boıynsha oqytý arqyly jumys sapasyn jaqsartsa, qurylystyń aldyn ala kemshilikterin tabý aldaǵy jumysty jeńildetip qana qoımaıdy, ýaqyt únemdelip, sapasy jaqsara túspek.
Sondaı-aq paneldik sessııa otyrystary medıa, mádenıet salasy juldyzdarynyń qatysýymen úzdik halyqaralyq tájirıbe men naryqtyq josparlaý, keıingi jańashyldyqtar, jasandy ıntellekt salasyndaǵy trendter, XXI ǵasyrdaǵy kıno mıssııasy taqyryptary talqylandy. Sýretshi, Massachýsets shtatynyń óner jáne dızaın kolledjiniń professory Elaın Býkhols jaryqtyń keńistiktik nysandarmen, músin jáne arhıtektýramen qarym-qatynasy týraly zertteýlerimen bólisti. «Sýretterdiń jyljymaly túsi ónerde jańa tájirıbe beredi. Jaryq pen tús gammasyn ózgertý qabyldaýdyń basqa prızmasy arqyly ózgeshe kórýge múmkindik beredi. Álemdik dúnıetanym shekarasyn keńeıtýge áser etedi», degen Elaın Býkhols sahnada jaryqty oınatý arqyly avtorlyq performans kórsetti.
Budan bólek Next Notes – Qazaqstan mýzykanttary qaýymdastyǵy avtorlyq ánderdi jazý men yntymaqtastyqty damytý boıynsha dáris ótkizse, tájikstandyq jazýshy Anısa Sabırı Ortalyq Azııa aımaǵyndaǵy áıel jazýshylardyń jaǵdaıy týrasynda baıandama jasady. Sondaı-aq, festıval aıasynda Qazaqstan, Reseı, AQSh jáne Eýropanyń ádebı jýrnaldarynda jarııalanyp júrgen aqyn, AQSh Ulttyq óner qorynyń álemdik ónerdegi joǵary jetistikterdi qoldaıtyn arnaıy qos granty men Käpylä Translation Prize (UCONN) syılyǵynyń ıegeri Áıgerim Tájiniń «Býmajnaıa koja/Paper-Thin Skin» (Zephyr Press, AQSh, 2019) atty óleńder jınaǵynyń tusaýkeseri ótti. Qoǵamnyń shyǵarmashylyq belsendiligi tulǵanyń, bıznestiń jáne tutastaı memlekettiń mańyzdy jetistigi retinde ózara básekelestik artyqshylyǵyn arttyrýǵa úndeıtin basqosý mádenı jáne áleýmettik-ekonomıkalyq damýdy yqpaldastyrýǵa shaqyrady. Osylaısha, qazirgi zamanǵy mádenı keńistiktiń biregeı alańyna aınalǵan GoViral halyqaralyq festıvali zamanaýı kózqaras arqyly jańa áleýmettik-mádenı ortany qalyptastyrýdyń kezekti márte ozyq úlgisin kórsetip berdi.
