Japon akteri, kásipker Iýıchı Ishı 38 jasta. Ol – týystar men dostardy jalǵa beretin fırmanyń ıesi. Aıtýynsha, bul ıdeıa osydan 14 jyl buryn aıaqasty paıda bolǵan. Balabaqshaǵa ulyn ornalastyrǵysy kelgen tanysy ýaqytsha «kúıeýi» bola turýyn ótingen eken. Osylaısha «áke» rólinen bastalǵan shaǵyn sahna kishigirim tabys kózine aınalyp júre bergen.
Orta eseppen jylyna 200 myń ajyrasý tirkeletin Japonııa halqy shynaıy sezimin kórsetýdi, syrtqa shyǵarýdy qup kórmeıdi. Jeke basynyń qadir-qasıeti, abyroıy keıde shyndyqtan da basym túsip jatatyny osydan bolsa kerek. Iýıchıdiń aıtýynsha, qazir kompanııada 2200 shtattan tys qyzmetker jumys isteıdi. Aqysyn tóleseńiz bolǵany ata-áje, áke-sheshe, dosy, atalas týysy, jamaǵaıyny degendeı keremetteı róldermen kóńilińizden shyǵady. Al Iýıchıdiń ózi shamamen 35 ret «áke» bolyp, jıyrma bes ret «úılengen», odan bólek júzdegen áıel túrli rólderge jaldap satyp alǵan. Sondaı-aq jalǵan týysy nemese tanysy esebinde 69 adammen únemi baılanysta. Rólderge kirý úshin, romantıkalyq komedııalar men serıaldardy qarap jattyǵady. «Baratyn kezde otbasy týraly málimetterdi qaıta pysyqtap alamyn. Barlyq aqparattar kitapshama jazylǵan, jańylyp qalǵan kezde tasaǵa baryp qarap alamyn», deıdi. Klıentter dos, ne týys adamdy jalǵa alý úshin tórt saǵattyq kezdesýge 20 myńdaı ıen (180 dollar) tóleıdi.
«Qazir adal dos tabý qıyn. Sondyqtan adamdar bizge júginedi. Olarmen serýendeýge, sóılesip, syr aqtarýǵa daıynbyz», deıdi Iýıchı The Atlantic basylymyna bergen suhbatynda. Onyń aıtýynsha, ara-tura qarttar jalǵyzdyqtan qutylý úshin «nemerelerdi» jaldaıdy. Dese de, «ákege» suranys óte joǵary.
