«Arystaǵy jarylystan zardap shekken azamattarǵa óz qoldaýymyzdy bildiremiz. Qazaqstan jastary stýdentteri sizdermen birge dep aıtqym keledi. Qazaqstan stýdentteriniń alıansy respýblıkalyq uıym bolǵandyqtan, Túrkistan oblysy men Shymkent qalasynda shtabymyz bar. Arys qalasynda eki kolledj ornalasqan. Sol jerde 800-den astam stýdentterimiz oqıdy. Shtab músheleri oqıǵa bolǵan kúni birden kómek kórsetýge kirisip ketti. Eriktiler toby quryldy, olar Arys turǵyndaryn basqa jerlerge kóshirýge kómektesti. Aımaqtaǵy shtabymyz ǵana emes, jalpy respýblıka boıynsha múshelerimiz atsalysyp jatyr. Mysaly, keshe Nur-Sultan qalasy ákimi orynbasarynyń qatysýymen shuǵyl jıyn ótti. Sodan keıin Jastar saraıynda Arysqa jóneltetin gýmanıtarlyq jáne materıaldyq kómek ortalyǵy ashyldy», deıdi Ilııas Tústikbaev.
Onyń aıtýynsha, stýdentterdiń arasynda qan tapsyryp kómektesip jatqandar bar.
«Elorda stýdentteri men jastary qan tapsyryp jatyr. Qan tapsyrǵan adamǵa 600 teńge tóleıdi. Sol aqshany alyp, kómek qorlarynyń resmı esepterine aýdardy. Odan bólek, Ońtústik Qazaqstan memlekettik ýnıversıtetiniń qyzmetkerleri 13 mln teńge aýdardy jáne 3 jataxqanaǵa 500 adamdy ornalastyrdy. Elordadaǵy birneshe joǵary oqý ornynyń qyzmetkerleri de bir kúndik jalaqylaryn Arysqa kómek retinde berip jatyr», deıdi ol.
Raýan QAIDAR,
«Egemen Qazaqstan»
