– Stýdentter qolóner baıqaýyna «Atqa miný mádenıeti», «Uly daladaǵy ejelgi metallýrgııa», «Ańdar stıli», «Altyn adam», «Túrki áleminiń besigi», «Uly Jibek joly», «Qazaqstan – alma men qyzǵaldaqtyń Otany» atty túrli ınstallıasııalardy jasap ákeldi, – deıdi basqarmanyń tehnıkalyq jáne kásiptik bilim berý bóliminiń ádiskeri Mıra Shyńǵysova.
Sóıtip «Urpaqtar sabaqtastyǵy» atalymynda Tehnıkalyq servıs kolledjinde dánekerleý isi mamandyǵy boıynsha oqıtyn 3-kýrs stýdenti Aleksandr Trýnov jeńimpaz atandy.
Kolledj dırektory Ánýarbek Ahmetshaıhovtyń aıtýynsha, osy oqý ornynda Aleksandr sııaqty talapty, qoldarynan is keletin 300-den asa aýyl, qala jastary bilim alýda. Túlekter óńirdegi kásiporyndarda eńbek etedi. Barlyq kásiporyndarmen Dýaldy oqytý boıynsha kelisimsharttar jasalǵan.
Baıqaýǵa qatysý úshin Aleksandr óndiristik oqytý sheberleri Aleksandr Nıkolaev, Beısenbı Ábilhasanovtyń jetekshiligimen metall qaldyqtarynan tulpar jasap shyǵypty.
Kolledj aldynda turǵan tulpardyń bıiktigi 1 metr.
– Tulpardy jasaýǵa eki aptadaı ýaqyt ketti. Jylqy pishinin qurastyrý jáne kólem berý úshin túrli dıametrli sym qoldandyq. Konstrýksııa men aıaq-qoldyń qattylyǵy úshin sharshy qubyr paıdalanyldy. Jobanyń beti tıisti forma berilgen tabaq temir jolaqtarynan jasalǵan, –deıdi Aleksandr.
Al «Kreatıvti joba» júldesin metall qaldyqtarynan bıiktigi 60 santımetr kıiz úı jasaǵan Montajdaý kolledjiniń stýdenti Iýrıı Týtaev ıelendi.
Júldegerler men jeńimpaz atanǵan 6 qolónershi stýdentterge dıplomdar tabys etildi.
PAVLODAR
