Zamanynda mádenı bolmysy men qundylyqtar júıesi tutas bolǵan Uly dala órkenıetin qaıta jańǵyrtýdy maqsat etken festıval bıyl ekinshi ret uıymdastyryldy. Jyl saıyn halyqaralyq aýqymdy sıpat alyp kele jatqan jıyn san ǵasyrlyq tájirıbedegi kóshpeli turmys saltyn mádenı turǵyda ortaq bir nátıjege jetkizýdi kózdeıdi.
– О́tken jyly 8 elden 90-ǵa jýyq ónerpaz kelgen bolsa, bıyl 10 memleketten 180-nen astam qatysýshy bas qosty. Atap aıtqanda, Ázerbaıjan, Mońǵolııa, Iran, Ońtústik Koreıa, О́zbekstan syndy elder. Mundaǵy maqsat – astanamyzdyń damyǵan búgingi kelbetin ǵana emes, baı mádenıetimizdi, tarıhı muralarymyzdy kórsetý, – deıdi «Kazakh Tourism» AQ tóraǵasynyń orynbasary Tımýr Dúısenǵalıev. Onyń aıtýynsha, festıvaldi dástúrli merekege aınaldyrý týrıstik salany ǵana emes, qomaqty tabys ákelý turǵysynan da tıimdi. Qalalar men aımaqtardaǵy jergilikti óndiristerdiń qosymsha damýyna yqpal etedi.
– Byltyr festıvalge 5 myńǵa jýyq qala turǵyndary men qonaqtar qatysty. Bıyl baǵymyzǵa oraı, 29 maýsym kúni Dımashtyń konsertke álemniń 60 elinen qonaqtar keldi. Al olardy mádenı alýandyqqa ıe osyndaı etno festıval nege qyzyqtyrmasqa?! Eýrazııalyq ıdeıa ekonomıkalyq turǵydan ǵana emes, mádenı birlestikke shaqyrady, – dedi ol.
Qatysýshylar qala kóshelerinde saltanatty sherýge shyǵyp, qonaqtar kásibı sadaqshylardyń atysyna, kókparshylar men búrkitshilerdiń saıysyna, jekpe-jek ónerine kýá boldy. Álemge tanylǵan etno-mýzyka oryndaýshylarynyń qatysýymen naǵyz meıramǵa aınaldy. Sonyń arasynda, taıaýda ǵana YouTube arnasynda tanymal bolyp, rok-mýzykany baǵalaýshylar ǵana emes, mádenıettanýshylar men tarıhshylardy tań-tamasha etken mońǵolııalyq «The Hu» folk-metal-toby óner kórsetti.
«Qazaqstan men Mońǵolııa arasynda birlesken josparlar boıynsha ortaq dúnıe jetkilikti. Qazir álemde kóshpendilerdiń etno mádenıetine qyzyǵýshylyq tanytyp otyrǵandar kóp. Mýzykadaǵy jańa baǵytty oılap taýyp, ony «hýnný-rok» dep atap, ishekti mýzykalyq aspaptar men kómeımen oryndaýdy sheber úılestirip júrgen «The Hu» toby, «The Altai band» syndy etno folk baǵytyndaǵy toptar án saldy. Kóshpendiler mádenıetin tanytýdy maqsat etken mundaı festıvalderdiń ulttyq turǵyda, álemdik aýqymda mańyzy óte joǵary. О́ner merekesine qatysý bizge úlken qýanysh syılaıdy», deıdi Mońǵolııa komandasynyń jetekshisi Dolgıon Balchııav.
Atalǵan is-sharanyń ótýine «Kazakh Tourism» AQ tarapynan Týrızm ındýstrııasy komıteti tapsyrysy boıynsha Nur-Sultan qalasy ákimdiginiń uıymdastyrýymen 130 mıllıon teńge bólingen. Qarjynyń basym bóligi sheteldik qonaqtardyń júrip-turýyna, olardy ornalastyrýǵa jumsaldy. «Kazakh Tourism» AQ keleshekte ishki týrızmniń damýyna oń áser etetin «Apple fest», «Altaı – órkenıet besigi» atty birqatar jıyndardy joǵary deńgeıde ótkizdi.
