Biz – kóp balaly otbasymyz. Tórt balam da mektepte oqıdy. Kúıeýim memlekettik mekemede júrgizýshi, ózim de Terekti aýdany ákimdigindegi bir bólimde hatshy bolyp qyzmet etemin. Ekeýmizdiń de aılyq eńbekaqymyz eldegi eń tómengi jalaqy qataryna jatady. Onyń ústine páter jaldap turamyz.
О́mir bolǵan soń basymyzdan túrli jaǵdaı ótkerip jatamyz ǵoı. 2014 jyly ekinshi deńgeıli bankterdiń birinen turmys qajeti úshin 300 myń teńge nesıe aldym. Úsh jylǵa eseptep alǵan nesıemdi 1,5 jyldaı ýaqtyly tólep turdym. 2016 jyly kúıeýim aıaq astynan jumyssyz qaldy. Qınaldyq. Nesıeni ýaqytynda tóleý túgili, kúndelikti turmys qajetin tabý qıyn boldy. Sóıtip, oılamaǵan jerden bankke boryshty boldyq.
Árıne «almaqtyń da salmaǵy» baryn túsinemiz. Biraq kútpegen kedergi jospardy buzdy. Osyndaı qıyn jaǵdaıǵa tap boldyq. Odan bergi sot sheshimderi jyǵylǵanǵa judyryq boldy. Búgingi nátıjesi – bankke áli 400 myń teńgedeı boryshtymyn. Onyń ústine sot oryndaýshysyna 80 myń teńge tóleýge tıistimin. Qazir aı saıyn onsyz da az jalaqymnyń teń jarymy sot sheshimi boıynsha «ustalyp», qaryzdy óteýge aýdarylyp otyrady.
Mine, Prezıdentimiz aıtqan «О́mirlik qıyn jaǵdaıda qalǵan Qazaqstan Respýblıkasy azamattarynyń» biri biz ǵoı dep oılaımyn. Memleket basshysy Jarlyǵynyń maqsaty – qıyn jaǵdaıǵa tap bolǵan azamattarǵa kómektesý, olarǵa ózderiniń otbasylarynyń qarjylyq ahýalyn aıtarlyqtaı jaqsartýǵa múmkindik berý ekeni sózsiz. Shynymen de bul úlken kómek bolmaq!
Aıta keteıin, bizdiń otbasy biraz jyldan beri turǵyn úı kezeginde turmyz. Terekti aýdany ortalyǵynda sý jańa úsh qabatty turǵyn úı qurylysy aıaqtalýǵa jaqyn qaldy. Buıyrsa, osy úıden úsh bólmeli páter tıedi dep qýanyp, óz baspanamyzdyń tabaldyryǵynan attar sátti kún sanap kútip júrgen edik. Búgingi jyly habar júregimizdi odan saıyn jylytty. Memlekettiń eldegi kóp balaly otbasylaryna qamqorlyǵy kún sanap kúsheıip keledi. Biz osyny sezinip otyrmyz.
Albına SARBО́PEEVA,
kóp balaly ana
Batys Qazaqstan,
Terekti aýdany
