Londonda ótken bıylǵy «Romford Film Festival» qazaq kınosy úshin eleýli tabystarymen este qaldy deýge negiz bar. Kınofestıval aıasynda ótken Eurasian Creative Guild Film Festival-de «Meniń atym Qoja» kartınasy «Máńgilik klassıka. Álemdik taný» qurmetti marapatyna ıe bolsa, «Qyz ben teńiz» fılminde basty róldi somdaǵan aktrısa Dınara Sháripova festıvaldyń «Eń úzdik aktrısasy» dep tanyldy. Al «Fınansıst» kartınasy «Kórermender kózaıymy» syılyǵymen marapattaldy.
– Bul Eýropada ótken alǵashqy eýrazııalyq kınofestıval. Soǵan qaramastan festıval óte tabysty ótti. Sheteldik áriptesterimiz kıno qoryna, álem mádenıetine jańa fılm qostyńdar dep erekshe qýanyp jatyr. Bul – halyqtyq kıno. Biz sony kórsetýdi maqsat ettik, – deıdi «Eurasian Creative Guild Film Festival» dırektory, dıstrıbıýtor Maıra Qarsaqbaeva. Onyń aıtýynsha, «Romford Film Festival» basshylyǵy tarapynan usynys túsken soń «Meniń atym Qoja» fılmin qysqa ýaqyt ishinde dýblıajdap shyǵarǵan. Fılmdi dybystaýǵa 17 adam qatysypty. Kishkentaı akterlerdi Amerıka men Ulybrıtanııa eliniń Qazaqstandaǵy ókilderiniń balalary oqıtyn úsh mekteptiń teatr úıirmelerinen tańdap alǵan. Áıtkenmen dýblıaj jumystaryn ótkizýge qarjynyń joqtyǵy qolbaılaý bolyp, bar múmkindiktermen iske asyrýǵa týra kelgen.
«Jaǵdaıymyzdy túsindirgen soń eresek akterler qoldaý kórsetip, tegin jumys istese, balalarǵa óz qaltamyzdan azyn-aýlaq aqy tóledik. Kóp adamnan qoldaý surap, hat jazǵanymyzben esh nátıje bolmady. Almaty qalasyndaǵy fızıka-matematıka baǵytyndaǵy Nazarbaev Zııatkerlik mektebiniń muǵalimderi mátindi redaksııalaýǵa kómektesti. Atalǵan mekteptiń dırektory Gúlfarıda Raısova apaıymyzǵa, zal men dybys rejısseriniń tegin qyzmetin usynǵan «Qazaqfılm» AQ basshylyǵyna erekshe alǵys bildiremin», deıdi Maıra Qarsaqbaeva.
Birqatar kórkem jáne derekti fılmderdiń atqarýshy prodıýseri bolyp uzaq jyldardan beri jumys istep kele jatqan maman kınoóndiris, dýblıaj ben prokat jaǵdaıyn bes saýsaqtaı biledi. «Kórsetilim kezinde londondyq kórermender bizden talantty mýzykant Nurǵısa Tilendıev, jazýshy Berdibek Soqpaqbaev týraly surady. Sondyqtan klassıkalyq fılmderdi túpnusqalyq erekshelikterin saqtaı otyryp, aǵylshyn tiline aýdaryp usynýymyz kerek. Kóptegen shet memleketterde bolyp júrmin, qazaqty teris qyrynan kórsetetin qazirgi arzanqol fılmderdi ońdy-soldy kórsete berý durys emes», degen ol ulttyq bolmysymyzdyń kórkemdik sıpatyn aıshyqtaıtyn shyǵarmalardyń suranysta ekenin aıtady.
Dástúrli Romford festıvali kıno alańy retinde kezdeısoq tańdalyp otyrǵan joq. О́ıtkeni Ulybrıtanııada kóptegen álemdik kınostýdııalardyń blokbasterleri túsirilip, montaj jumystary jasalady. Uıymdastyrýshylardyń aıtýynsha, festıval eýrazııalyq kınony aǵylshyn tilinde nasıhattaýdy, sondaı-aq kıno óndiris ókilderin búkil álemniń kásibı mamandarymen tanystyrýdy maqsat etedi.
