Túsirilim jumystary Túrkistan, Almaty jáne Ystanbul qalalarynda ótken. Fılmde aqqan juldyzdaı jarq etip, az ǵana ǵumyr keshken sportshynyń ómiri men sporttaǵy jetistigi sýretteledi. Týyndynyń sıýjettik jelisinde Bekzat Sattarhanov ómiriniń úsh kezeńi qamtylady. 90-jyldardyń basyndaǵy qıyn-qystaý kezeńge tap kelgen Bekzattyń balalyǵy kóp qıyndyqtarmen ótedi. Túrkistan qalasyndaǵy temir joldy boılaı ornalasqan shaǵyn aýyldyń qarapaıym tirshiligi bala Bekzattyń kózimen beınelenedi. Onyń armany, namysqoı bitimi árbir sátte synalyp otyrady.
«Bul búkil ómiri emes, ómirindegi bir kezeń. Boksqa qalaı keldi, ómirinde qandaı qyzyq oqıǵalar boldy. Bul jobadaǵy eń bastysy – Sıdneıdegi oqıǵa. Kartınada osy máseleler kóteriledi», deıdi rejısseri Murat Bıdosov.
Keıipkerlerdi tańdaǵanda tek akterlik sheberligi emes, sporttyq daıyndyǵy da eskerilgen. Máselen, basty ról Bekzatty jas akter Samat Ázimqulov oınaıdy. Ol 2006-2007 jyldary kıkbokstan jastar arasynda eki ret Qazaqstan chempıony bolǵan.
«Bul bir adamnyń ómiri, bir adamnyń taǵdyry. Jalpy, osy fılm arqyly Bekzat aǵamyzdy qaıta tiriltip, artymyzdan ósip kele jatqan jastardyń sportqa degen qulshynysyn arttyrsaq jáne tıtteı de bolsyn bir patrıottyq sezim uıalata alsaq, armanymyzdyń oryndalǵany dep bilemin», deıdi akter Samat Ázimqulov. Uıymdastyrýshylardyń aıtýynsha, fılm jalpy prokatqa kúzde shyǵady. Artynsha «Habar» arnasynan birneshe serııadan turatyn telehıkaıa kórsetiletin bolady.
