QR Premer-Mınıstri Asqar Mamınniń tóraǵalyǵymen QR Úkimetiniń otyrysy ótti. Kún tártibinde Memleket basshysy Qasym-Jomart Toqaevtyń QR Tuńǵysh Prezıdenti - Elbasy Nursultan Nazarbaevtyń qazaqstandyqtardyń ál-aýqatyn arttyrý boıynsha strategııasynyń jalǵasy bolyp tabylatyn áleýmettik máselelerdi sheshý boıynsha tapsyrmalaryn oryndaý máseleleri qaraldy.
QR Úkimetiniń otyrysy kezinde 2019-2021 jyldarǵa arnalǵan respýblıkalyq bıýdjetke jáne 2017 – 2021 jyldarǵa arnalǵan, shaǵyn nesıelendirý quraldaryn keńeıtýge, granttar bólýge, qysqa merzimdi oqytýǵa jáne kásipkerlik negizderine oqytýǵa baǵyttalǵan «Eńbek» ónimdi jumyspen qamtý jáne jappaı kásipkerlikti damytý memlekettik baǵdarlamasyna ózgerister men tolyqtyrýlar engizý týraly qaýly jobalary qabyldandy. Jumyssyzdardy ónimdi jumyspen qamtýǵa tartýdyń mańyzdylyǵyn eskere otyryp, «Eńbek» memlekettik baǵdarlamasynyń tetikterin keńeıtýge qosymsha 50 mlrd teńge qaralady.
«Qazaqstandyqtardyń ál-aýqatyn arttyrý - QR Úkimetiniń jumysynyń negizgi baǵyty», – dedi Asqar Mamın. Mınıstrler kabınetiniń birinshi kezektegi mindeti - áleýmettik qoldaý sharalaryn iske asyrýǵa birden kirisý, olardy ýaqytyly oryndaý úshin barlyq uıymdastyrýshylyq jáne quqyqtyq is-sharalardy shuǵyl júrgizý. Bul azamattardyń materıaldyq ál-aýqatyn jaqsartýǵa múmkindik beredi.
QR Úkimetiniń basshysy memlekettik organdarǵa bir apta ishinde azamattardyń borysh júktemesin azaıtýǵa bólingen qarajatty paıdalaný tetikterin aıqyndaýdy, azamattardyń kepilsiz tutynýshylyq nesıeleri boıynsha jınaqtalǵa aıyppuldar men ósimpuldardy esepten shyǵarýdy tapsyrdy.
Sonymen qatar QR Premer-Mınıstri jumysqa ornalasýǵa muqtaj adamdardy izdeý men bos jumys oryndaryn toltyrýdyń belsendi formatyna kóshý arqyly Halyqty jumyspen qamtý ortalyqtarynyń jumysyn jetildirýdi tapsyrdy.
Turǵyn úımen qamtamasyz etý baǵyty boıynsha memlekettik organdarǵa jumys isteıtin jastar arasynda turǵyn úı bólý tetigin bekitýdi aıaqtaýdy jáne turǵydan az qamtylǵan otbasylarǵa turǵyn úı satyp alý úshin jeńildikti nesıeler berý tetigin iske qosýdy jedeldetý tapsyryldy.
«1 qyrkúıekten bastap turmysy tómen jáne kópbalaly otbasylardan shyqqan balalarǵa 5 myń nysanaly bilim granty qosymsha bólinedi, jumysshy mamandyqtarynyń stıpendııasy 30 paıyzǵa artady», - dedi Asqar Mamın jáne osy granttardy berýdi qamtamasyz etýdi tapsyrdy.
Barlyq óńirlerdiń ákimderine búkil normatıvtik rásimderdi qatań saqtaý, ataýly áleýmettik kómek alýshylarǵa monıtorıng júrgizý tapsyryldy.
Turǵyndardy nátıjeli jumyspen qamtý sharalarymen qamtýdy arttyrý úshin QR Premer-Mınıstrine Atyraý, Jambyl, Almaty, Aqtóbe jáne Túrkistan oblystarynyń oń tájirıbesin eskerýmen turǵyndardyń tabysyn arttyrý úshin óńirlerdiń skrınıngin iske asyrý josparyn jáne ádistemesin ázirleý tapsyryldy. Skrınıng bazasynda kásipkerler men úı sharýasyndaǵy áıelderge saýalnama júrgizý qamtamasyz etiledi.
«Qabyldanyp jatqan sharalar eń aldymen naqty muqtaj azamattardy qoldaýǵa, onyń ishinde jastardy qoldaýǵa, sondaı-aq adamdardy jumyspen qamtýǵa baǵyttalǵan, — dedi QR Premer-Mınıstri. — Bizdiń azamattarymyzdyń problemalaryn sheshý kóp jaǵdaıda úılesimdi jumysqa baılanysty».
