QR Premer-Mınıstri A. Mamınniń tóraǵalyǵymen ótken Úkimet otyrysynda Premer-Mınıstrdiń birinshi orynbasary – qarjy mınıstri Á. Smaıylov 2019 jylǵa arnalǵan respýblıkalyq bıýdjetti naqtylaý jónindegi zań jobasyn tanystyrdy.
Á. Smaıylovtyń aıtýynsha, Memleket basshysynyń qazaqstandyqtardyń ál-aýqatyn arttyrý jáne áleýmettik máselelerdi sheshý jónindegi tapsyrmalaryn iske asyrý, sondaı-aq, Prezıdenttiń 26 maýsymdaǵy «Qazaqstan Respýblıkasy azamattarynyń borysh júktemesin azaıtý sharalary týraly» Jarlyǵyn iske asyrý maqsatynda Úkimet 2019 jylǵa arnalǵan respýblıkalyq bıýdjetti naqtylaý jónindegi zań jobasyn ázirledi.
«Naqtylaýdy bıylǵy sáýir aıynda túzetilgen, 2019 jylǵa arnalǵan elimizdiń áleýmettik-ekonomıkalyq damý boljamynyń kórsetkishterin saqtaı otyryp júrgizý usynylady», — dedi Á. Smaıylov.
2019 jylǵa arnalǵan respýblıkalyq bıýdjettiń negizgi parametrleri ózgerissiz qalady: túsimder – 10,5 trln teńge; shyǵystar – 11,9 trln teńge; tapshylyq – 1,4 trln teńge nemese jalpy ishki ónimge 2,1 %.
Prezıdenttiń tapsyrmalaryn qarjylyq qamtamasyz etý Tikeleı ınvestısııalar qoryn qurýǵa kózdelgen qarajattyń bir bóligin qaıta bólý esebinen iske asyrylatyn bolady (370 mlrd teńgeden 300 mlrd teńge).
Bıýdjettiń shyǵys bóligin naqtylaý úsh baǵyt boıynsha júzege asyryldy.
Birinshi. Halyqtyń tutynýshylyq nesıeleri boıynsha borysh júktemesin azaıtý.
О́mirlik qıyn jaǵdaıda qalǵan azamattar sanatyna jatqyzylǵan árbir qaryz alýshy úshin tikeleı jáne ataýly qarjylyq kómek retinde memleket 300 myń teńgege deıingi jalpy mólsherde negizgi boryshty jáne ol boıynsha eseptelgen syıaqyny óteıdi. Osy maqsattarǵa joba 88,5 mlrd teńge somasynda shyǵystardy qarastyryp otyr.
Ekinshi. Jumyspen qamtý, az qamtylǵan, kóp balaly otbasylar men jastardy qoldaý boıynsha pármendi sharalardy keńeıtý jáne kúsheıtý.
Bul maqsattarǵa 138,6 mlrd teńge baǵyttalatyn bolady, onyń ishinde:
-
1,5 mlrd teńge osy jyldyń 1 qyrkúıeginen bastap az qamtylǵan jáne kóp balaly otbasylardan shyqqan balalar úshin joǵary oqý oryndaryna qosymsha 5 myń bilim berý granttaryn bólýge;
-
2,4 mlrd teńge osy jyldyń 1 qyrkúıeginen bastap tehnıkalyq jáne kásiptik bilim berýde jumysshy mamandyǵy boıynsha oqyp júrgen stýdentterdiń stıpedııasyn 30 paıyzǵa ulǵaıtýǵa. Bul 122 myń oqýshyny qamtıdy;
-
49,2 mlrd teńge «Bastaý Bıznes», qysqa merzimdi kásiptik bilim berý tetikteri arqyly jumyssyzdar men ózin-ózi jumyspen qamtyǵandardy jumyspen qamtýǵa járdemdesý sharalarymen qamtamasyz etýge, sondaı-aq «Eńbek» baǵdarlamasy boıynsha aýyldarda shaǵyn nesıe berý kólemin jáne startap jobalarǵa beriletin granttar sanyn ulǵaıtýǵa;
-
14,4 mlrd teńge Nur-Sultan, Almaty, Shymkent qalalarynda 10 myń adamdy qamtı otyryp jumys isteıtin jastar úshin satyp alý quqyǵynsyz jalǵa beriletin turǵyn úı salý kólemin 1 myń páterden 3 myń páterge deıin ulǵaıtýǵa;
-
70 mlrd teńge ataýly áleýmettik kómek tólemderin osy jyldyń 1 sáýirine kóshirýge baılanysty qarajattyń qajettiligin jabýǵa;
-
1,1 mlrd teńge tehnıkalyq jáne kásiptik bilim berý mekemeleri, joǵarǵy oqý oryndary stýdentterin oqytýǵa.
Úshinshi. Jobada Úkimet rezervin 72,9 mlrd teńgege ulǵaıtý usynylady. Atalǵan qarajattyń bir bóligi Arys qalasyndaǵy tótenshe jaǵdaıdyń saldarlaryn joıýǵa baǵyttalatyn bolady.
Budan ózge, 35,9 mlrd teńge kóleminde qarajatty ishki qaıta bólý esebinen keıinge qaldyrýǵa bolmaıtyn sheshimderdi talap etetin birqatar mindettemeler qarjylandyrylatyn bolady.
«Barlyq ázirlengen áleýmettik sharalar mańyzdy. Zań jobasyn Parlament qaraýyna baǵyttaýdy usynamyz», — dep túıindedi Á. Smaıylov.
Memleket basshysynyń Jarlyǵyn iske asyrý, sonyń ishinde kepilsiz tutynýshylyq zaım berýdi retteý sharalary boıynsha Ulttyq bank qabyldap jatqan qosymsha sharalar týraly Ulttyq bank tóraǵasy E. Dosaev aıtyp berdi.
Onyń aıtýynsha, Qazaqstan Respýblıkasynyń Prezıdenti Qasym-Jomart Toqaevtyń «Qazaqstan Respýblıkasy azamattarynyń borysh júktemesin azaıtý sharalary týraly» Jarlyǵyn iske asyrý maqsatynda QR Ulttyq Banki Úkimetpen, banktermen jáne shaǵyn qarjy uıymdarymen birlesip, 2019 jylǵy 1 maýsymdaǵy jaǵdaı boıynsha kepilsiz tutynýshylyq qaryzdar boıynsha 300 myń teńgeden aspaıtyn somada ómirlik qıyn jaǵdaıda qalǵan azamattardyń bereshegin óteý tetigin ázirledi.
