DEPÝTATTAR ÚNDEÝ JARIIаLADY

Parlament Májilisiniń jalpy otyrysynda bir top depýtat Qazaqstan Respýblıkasy Parlamenti Májilisi men Senaty depýtattaryna, respýblıkalyq deńgeıdegi barlyq memlekettik organdar men vedomstvolardyń qyzmetkerlerine úndeý joldady. Onda bylaı delinedi: “Qadirli áriptester! Qurmetti baýyrlar! Almaty oblysy, Aqsý aýdany Qyzylaǵash aýylynyń topan sý astynda qalyp, 37 adamnyń opat bolǵanyn jaqsy bilesizder. Qyzylaǵashtaǵy sý qoımasynyń apatyna baılanysty Elbasy jumys keńesin ótkizip, Úkimet aldyna naqty tapsyrmalar qoıdy. Zardap shegýshilerge qarjylaı, materıaldyq, medısınalyq kómek berýdi, barlyq sý qoımalarynyń jaǵdaıyn tekserip, shuǵyl sharalar qabyldaýdy mindettedi. Qyzylaǵashtaǵy 465 úıdiń 146-syn sý shaıyp, 251 úı turýǵa kelmeıtin jaǵdaıda. Al 42 úı kúrdeli jóndeýdi qajet etedi. Apat bolǵan jerde Premer-Mınıstr bastaǵan Úkimettik komıssııa boldy. 700 adam Taldyqorǵanǵa, 300 adam Saǵabıen aýylyna kóshirildi. Memleket tarapynan qomaqty qarjy bólindi. Ár oblys ákimdikteri kem degende 50 mıllıonnan astam qarjy bóldi. Demeýshiler de qomaqty qarjy aýdardy. Almatynyń 10 joǵary oqý ornynyń stýdentteri men jastar uıymdary apattan zardap shekken turǵyndar úshin gýmanıtarlyq kómek jibere bastady”. “Kóp tilegi – kól” degen. Osy úndeýge Májilis depýtattary D.Nóketaeva, G.Qaraǵusova, A.Samaqova, Z.Balıeva, L.Hochıeva, G.Isimbaeva, S.Toqpaqbaev, Ú.Medeýov, K.Bıjanov, E.Omarov, T.Asanov, R.Sárpekov, N.Sabılıanov, Ý.Qalıjanov qol qoıa otyryp, árqaısysy 100 myń teńgeden aqsha aýdaratyndyqtaryn málimdedi jáne Senat depýtattaryn, barlyq deńgeıdegi memlekettik organdar men vedomstvolardyń qyzmetkerlerin bir kúndik eńbekaqylaryn apat zardaptaryn joıýǵa arnalǵan qorǵa aýdarýǵa shaqyrdy. Endi bank esep-shotyn nazarlaryńyzǵa salaıyq: “Qazaqstannyń halyq banki” AQ Taldyqorǵan aımaqtyq fılıaly: IIK: 002700125 kzt            RNN: 530200007643 BIK banka: 194101601       Kbe: 18 “Egemen-aqparat”.