Rýhanııat • 04 Shilde, 2019

Qos kitap jaryq kórdi

440 ret

kórsetildi

1 mın

oqý úshin

3 shilde kúni elordada eki kitap qalyń oqyrmanǵa tanystyryldy. Birinshisi – Qazaqstan strategııalyq zertteýler ınstıtýtynyń qyzmetkeri, belgili ǵalym Murat Laýmýlınniń «Álemdik orıentalıstıkadaǵy Qazaqstan» kitaby. Monografııa alǵash ret qazaq tilinde basylyp shyqty.

Egemen Qazaqstan

Kitapta shetel zertteýshileriniń qazaqtar týraly jazǵan eńbekterine saraptama jasalǵan. Qazaqtardyń tarıhy men mádenıetine qatysty Batys ǵalymdarynyń kózqarasyn osy eńbekten tabýǵa bolady.

Tusaýy kesilgen kelesi kitap XVIII-XIX ǵasyrdaǵy Uly dala bıleýshileriniń dıplomatııalyq qyzmetine arnalǵan. Bul – tarıh ǵylymdarynyń doktory Klara Hafızovanyń 50 jyldyq eńbeginiń jemisi. Jınaqta kóshpendilerdiń saıası-naryqtyq ómiri men órkenıeti keńinen sıpattalǵan. Ǵalym qytaı jáne orys derekterine úńile otyryp, qazaq dalasyndaǵy sultandardyń keń-baıtaq jerdi saqtap qalýdaǵy dıplomatııalyq is-áreketteri men eńbekterin zerttegen. Avtordyń pikirinshe, kóshpeli halyqtyń dıplomatııasy tıimdi bolǵan. El bıleýshileri qos iri kórshiniń, musylman áleminiń jáne Qoqan handyǵynyń arasynda bola tura, ózimizdiń dástúrimizdi, jerimizdi saqtap qalǵan. K.Hafızova óz eńbegi arqyly oqyrmanǵa osy oıdy jetkizgisi kelgen.

Tanystyrylymǵa kelgen ózge de sarapshylar qos kitaptyń qundylyǵyna baǵa berip jatty. Máselen, «Sakraldy Qazaqstan» ǵylymı-zertteý ortalyǵynyń basshysy Berik Ábdiǵalıulynyń oıynsha, biz sheteldik ǵalymdardyń qazaqtar týraly jazǵan eńbeginen beıhabarmyz. Orta ǵasyrdan bastap, keshegi kúnge deıin shetelde Qazaqstan týraly, qazaqtar týraly jazylǵan zertteý jumystaryn osy kitaptardan oqýǵa bolady. Sondyqtan eki kitap túrli sanattaǵy oqyrman úshin qundy eńbek bolýy múmkin.