Portý-Alegrı qalasyndaǵy «Arena Gremıoda» ótken kezdesýde Chılı men Perý quramalary ózara sheberlik baıqasty. Dál osy týrnırdiń sońǵy ekeýinde chılılikter bas júldeni oljalaǵan bolatyn. Sondyqtan da olar búgin ótken matchtyń favorıtteri sanaldy. Biraq múıizi qaraǵaıdaı qarsylasynan esh qaımyqpaǵan perýlikter 3:0 esebimen jeńiske jetip, aıdy aspanǵa bir-aq shyǵardy. Bul básekede Flores (21-mınýt), Iotýn (38-mınýt) jáne Gerrero (90+1 mınýt) gol soqty.
Argentına men Chılı arasyndaǵy qola medal úshin tartys 7-shildede San-Paýlýdaǵy «Arena Korıntıansta», al Brazılııa men Perý arasyndaǵy bas júlde úshin báseke 8-shildede Rıo-de-Janeırodaǵy «Marakana» stadıonynda ótedi.
