Fılmde aqqan juldyzdaı jarq etip, az ǵana ǵumyr keshken sportshynyń ómiri men sporttaǵy jetistigi sýretteledi. Týyndynyń sıýjettik jelisinde Bekzat Sattarhanov ómiriniń úsh kezeńi qamtylady. 90-jyldardyń basyndaǵy qıyn-qystaý kezeńge tap kelgen Bekzattyń balalyǵy kóp qıyndyqtarmen ótedi. Túrkistan qalasyndaǵy temir joldy boılaı ornalasqan shaǵyn aýyldyń qarapaıym tirshiligi bala Bekzattyń kózimen beınelenedi. Onyń armany, namysqoı bitimi árbir sátte synalyp otyrady. Týyndynyń rejısseri – Murat Bıdosov, al basty róldi Samat Ázimqulov somdady. Fılmniń saltanatty tusaýkeserine Aqparat jáne qoǵamdyq damý mınıstri Dáýren Abaev, Mádenıet jáne sport mınıstrligi Sport jáne dene shynyqtyrý isteri komıtetiniń tóraǵasy Serik Sápıev, «Habar» agenttigi» AQ basqarma tóraǵasynyń birinshi orynbasary Rınat Kertaev qatysty.
– Bul – jıyrma jyl ǵana ómir súrip, qazaqtyń abyroıyn, qazaq boksynyń mártebesin asqaqtatqan dańqty bokshymyzǵa arnalǵan týyndy. Portrettik fılmdi kórermen kóp kútti. Biz ony bilemiz. Alaıda osy taqyrypqa asyǵys, daıyndyqsyz kelý durys bolmaıtyn edi. Bul Bekzattyń rýhy aldyndaǵy, halyq aldyndaǵy úlken jaýapkershilik bolatyn. Aqparat jáne qoǵamdyq damý mınıstrligi qoldady, «Habar» agenttigi jaýapty jumysty oıdaǵydaı atqaryp shyqty. Ult maqtanyshy – Bekzat Sattarhanovtyń esimi, beınesi eldiń júreginde máńgi saqtalady, – dedi Aqparat jáne qoǵamdyq damý mınıstri Dáýren Abaev.
Kórsetilimge boksshynyń ata-anasy Túrkistannan arnaıy kelip qatysty. Chempıonnyń anasy Syrlykúl Adyrbekqyzy jýrnalısterge balasy týraly fılm túsirilgenine qýanyshty ekenin jetkizdi. «Búgin – meniń týǵan kúnim. Fılmniń tusaýkeseri týra osy kúnge sáıkes kelipti. Bul – qýanyshty jaǵdaı. Kıno sátti túsirildi dep oılaımyn. Fılmge baǵany halyq beredi. Osy kınony túsirgen azamattarǵa alǵys aıtamyn» deıdi qýanyshyn jasyra almaǵan ana. Uıymdastyrýshylardyń aıtýynsha, fılm osy jyldyń qazan aıynda el turǵyndarynyń nazaryna usynylady. Al alty serııadan turatyn tolyq nusqasy Táýelsizdik kúni qarsańynda «Habar» agenttiginiń efırinen kórsetiledi.
Sharshy alańda kók baıraǵymyzdy jelbiretip, mereıimizdi asyrǵan Bekzattyń jeńispen oralǵan bette «Qudaı qalasa, halqyma áli eki Olımpıada altynyn syılaımyn. Kýbalyqtar ǵana emes, qazaqtar da úsh dúrkin Olımpıada chempıony bola alady. Tek sony dáleldeý ǵana qajet. Men ol úshin barymdy salamyn!» degen jigerli sózderi jadymyzda. Az ǵumyrynda artyna óshpes iz qaldyrǵan azamatty halqy áli kúnge deıin ardaqtaıdy. Keshegi «Bekzat» fılmine kelgen kópshilik yqylasy osyǵan dálel.
