Elbasy qaı kezde de óz halqymen birge. Tuńǵysh Prezıdenttiń óz halqymnan, sonyń ishinde elordalyqtardan bólip jaratyn eshteńem joq degen júrekjardy sózi árbir qazaqstandyqty tereń oıǵa qaldyra aldy. Tuńǵysh Prezıdentimizdiń Qazaqstannyń, bolashaǵy jarqyn, keleshegi kemel bolýy úshin tyndyrǵan isteri ushan-teńiz. Sondaı-aq elordanyń eńsesi bıik bolyp, sáni men sáýleti kelisim tabýy jolynda da atqarǵan qyzmetterine eshqandaı baǵa jetpeıdi.
Ol óziniń qajymas qaıraty men mol kúsh-jigeri arqyly álem kartasyndaǵy ózge birde-bir qalanyń kóshirmesi bola almaıtyn, qaıtalanbas ajary men kelbeti bar Qazaq eliniń elordasyn óz qolymen turǵyza bildi. Bul rette onyń asa bıik, ári túpsiz tereń arhıtektýralyq qabilet-qarymy men talantyna bas ımeý, ony moıyndamaý múmkin emes.
Taǵy bir aıtarym, óz basym sońǵy otyz jyldyń ishinde qadasy men kirpishinen bastap tutastaı jańa astana turǵyzǵan el-jurtty esime túsire almaı otyrmyn. Munyń basty mysaly búgingi Nur-Sultan qalasy desek qatelese qoımaspyn.
Elordamyzdyń Nur-Sultan qalasy dep atalýyna alǵashqylardyń biri bolyp ún qosyp qoldaý bildirgen aqtóbelikter ekenin de aıta ketýdiń artyqshylyǵy joq dep bilemin. Osy oraıda júzdegen, myńdaǵan jerlesterimniń qatarynda Nur-Sultan ataýyna qoldaý bildirip, óz oı-pikirim men únimdi bildirgen bolatynmyn. Bul Elbasynyń ólsheýsiz eńbegine saı óte oryndy jasalǵan qadam. Taǵy bir aıtarym, Nur-Sultan ataýy jazylýǵa da aıtylýǵa da óte yńǵaıly. Án sózindeı áýezdi estiledi.
Elbasy Nursultan Nazarbaev ótken jyldyń qońyr kúzinde Aqtóbege kelgen saparynda «óse ber, órkendeı ber, qutty meken – Aqtóbe» dep, aq batasyn berip ketken edi. Bul tilek barlyq aqtóbelikterdi jańa tabystar men jetistikterge talpyndyra túsetini anyq. Ári Elbasy tarapynan aıtylǵan mundaı bıik baǵanyń salmaǵy men jaýapkershiligi de joǵary bolmaq. Qoryta aıtqanda, Nursultan Nazarbaev elordamyzdyń álem kartasynan oryn alýyna ári onyń qaz basyp qalyptasýyna ólsheýsiz eńbek sińirgen qaıtalanbas tulǵa dep bilemiz.
Keldibaı ESPAǴAMBETOV,
eńbek ardageri
AQTО́BE
