Aqparat salasy mamandarynyń abyroıyn asyryp, mereıin tasytatyn aıtýly Nur Suńqar konkýrsy bıyl onynshy ret saltanat qurdy. Osy aralyqta baıqaý jýrnalısterdiń qalamyn ushtap, shabytyn shyńdaýǵa baǵyttalǵan bedeldi is-sharaǵa aınaldy. Mereıtoılyq marapattaý rásimin Nur Otan partııasy Tóraǵasynyń birinshi orynbasary Baýyrjan Baıbek ashyp, qazirgi tańda jýrnalıstıkanyń qoǵamdaǵy róli men yqpalyna toqtaldy. «Memleket basshysy Qasym-Jomart Toqaevtyń bastamasymen 28 maýsym Jýrnalıster kúni retinde óz aldyna bólek mereke bolyp bekitilgenin jaqsy bilesizder. Bul – jýrnalısterdiń qoǵamdaǵy mártebesin odan ári ósiretin ıgi bastama. Bıyl Nur Suńqar konkýrsy Prezıdent saılaýyna baılanysty merziminen kesh ótkizildi. On jyl boıy BAQ ókilderiniń úzdikterin anyqtap kelgen bul jolǵy baıqaý Nur Otan partııasynyń 20 jyldyǵymen tuspa-tus kelip otyr. Búginde jańa tehnologııalar damyp, adamdardyń aqparatqa qanyǵý múmkindigi kúsheıdi. Osy tusta halyqqa shynaıy ári jedel habar taratatyn kásibı jýrnalısterdiń mańyzy odan saıyn arta tústi», dedi Baýyrjan Baıbek.
Sondaı-aq saltanatty sharada Aqparat jáne qoǵamdyq damý mınıstri Dáýren Abaev sóz alyp, Nur Suńqar syılyǵy medıa-landshafqa sony serpin qosyp, úzdikterge laıyqty marapat bolǵanyn, osyndaı is-sharalar aqparat salasyndaǵy ilkimdi jumystardy ilgeriletetinin aıtty.
Nur Otan partııasy bastamashy bolǵan bıylǵy konkýrstyń uıymdastyrý komıtetine 207 jýrnalısten myńǵa jýyq jumys kelip túsken. Olardyń ishinen sózi júıeli, oıy tııanaqty úzdikterdi Parlament Májilisiniń depýtaty Qýanysh Sultanov tóraǵalyq etken komıssııa músheleri jeńimpaz dep tanydy. Sonymen Nur Suńqar-2019 baıqaýynyń jeńimpazdary 10 atalym boıynsha qara úzip shyqty.
Onyń ishinde orny erekshesi – qalamy tóselgen, sheberligi shyńdalǵan jýrnalıske buıyratyn «Sóz zergeri» atalymy. Bıyl bul atalymdy qazaq baspasóziniń qara shańyraǵy, ǵasyrlyq tarıhy bar «Egemen Qazaqstan» gazeti bas redaktorynyń orynbasary Ǵabıt Músirep ıelendi.
Sonymen qatar Elbasy qyzmetin úzdik nasıhattaǵany úshin «Elbasy salǵan sara jol» atalymyna – Igor Prohorov («Kazahstanskaıa pravda» gazeti), otandyq jýrnalıstıkany damytýǵa qosqan úlesi úshin «Maıtalman» atalymyna – Nurtileý Imanǵalıuly («Jetisý» telearnasy), úzdik gazet jýrnalısi retinde «Master slova» atalymyna – Talǵat Esenov («Lıter» gazeti) jáne baǵdarlamany ilgeriletýge qosqan úlesi úshin «Rýhanı jańǵyrý» atalymyna Bazarkúl Otynshıeva («Astana» telearnasy) men Aıgúl Kemelbaeva («Abaı» jýrnaly) laıyq boldy.
Buǵan qosa úzdik televızııalyq jýrnalıster Aıbek Qobdabaı («Qazaqstan» telearnasy) – «Halyq daýysy», Juraǵat Baman («Habar» telearnasy) – «Tochka zrenııa», úzdik jas jýrnalıster Sáken Mahametkerimov, Nazymgúl Kúmispaeva («Habar» telearnasy) – «Jas serpilis», ınternet basylymnyń úzdik jýrnalısi Aqmaral Oljabaeva (Bnews.kz) «Medıa-profı» atalymdarymen marapattaldy. Sondaı-aq «Partııa jobalaryn úzdik nasıhattaǵany úshin» Ekaterına Brynıýk («Astana» telearnasy) pen Gúljan Rahmanǵa («Aıqyn» gazeti) syılyqtar tabystaldy.
