Qazaqta dombyra jasaıtyn sheberler az bolmaǵan, qazir de aramyzda bar. Qyzyǵy sol, ulttyq aspapty jasaý tehnologııasy bir bolǵanymen, ár aspaptyń úni ár bólek shyǵady. Atyraýda ótken «Úkili dombyra» respýblıkalyq baıqaýyna qatysýshy qolónershilerdiń jasaǵan aspaptarynan da osyny ańǵardyq.
Elbasynyń «Bolashaqqa baǵdar: rýhanı jańǵyrý» baǵdarlamalyq maqalasy aıasynda uıymdastyrylǵan shara Ulttyq dombyra kúnine arnaldy. Elimizdiń túkpir-túkpirinen kelgen 30 úmitkerdiń eńbekterin baǵalaǵan qazylar alqasynyń tóraǵasy, Qazaqstannyń eńbek sińirgen qaıratkeri, kúıshi-kompozıtor Shámil Ábiltaev: «Baıqaýǵa usynylǵan dombyranyń úni taza, qońyr, tembri jumsaq, qulaqqa jaǵymdy bolýy, syrt pishini estetıkalyq turǵydan úılesimdi bolýy sekildi basqa da talaptar qoıyldy. Bastysy, dombyranyń qalpyn buzbaı, qazaqy qońyr únniń saqtalýy sheberlerdiń qanshalyqty deńgeıde ekenderin kórsetedi», dep atap ótti.
– Baıqaý barysynda mýzeıdiń «Etnografııa» jáne «О́lke tabıǵaty» zaldarynda qolóner sheberleriniń dombyra jasaýdan sheberlik saǵattary jáne teri, aǵash buıymdarynan kórme jármeńkesi uıymdastyryldy, – deıdi oblystyq tarıhı-ólketaný mýzeıi basshysynyń orynbasary Saıa Ǵazımova.
«Úkili dombyranyń» bas júldesin batysqazaqstandyq Ásıma Imanǵalıeva jeńip aldy. Júldegerler qatarynda esimderi atalǵan Azat Úzenbaev, Talant Tejekenov, Áset Isekeev, Meıirbek Dilmanov, Ǵanı Jumabaev, Erasyl Ýálıevter jasaǵan aspaptar oblystyq mýzeıdiń qoryna qabyldandy. Aıta keteıik, mýzeı qorynda 60-tan astam dombyra jınaqtalǵan arnaıy kolleksııa bar.
ATYRAÝ
