– Súırik – bekire tuqymdas tushy sý balyǵy. Uzaq ómir súredi. Salmaǵy 250-800 gramm ǵana bul balyqty ustaý úshin arnaıy ruqsat kerek. Elimizdiń «Qyzyl kitabyna» engizilgen ol Jaıyq, Ertis, Tobyl ózenderinde kezdesedi, – deıdi ınspeksııa mamany Narıman Qýanyshuly.
Mamandardyń aıtýynsha, bekireler súıekti-shemirshekti bolyp, basqa balyqtardan ishki-syrtqy pishinimen erekshelenedi. Halqymyz bul balyqtyń qasıetin baǵalap, súırikteı sulý deıtini de sodan. Denesi uzynsha, bes qatar súıekti ósindilermen jabylǵan. Bir qatary arqasynda, ekeýi eki búıirinde jáne ekeýi qursaǵynda, osy qatarlardyń ortasynda usaq súıekti túıirshekter men taqtaıshalar bar. Basy konýs tárizdi sozylǵan jáne tumsyǵy kúrek tárizdi. Tómengi jaqta tisi joq.
Oblystyq Orman sharýashylyǵy jáne janýarlar dúnıesi aýmaqtyq ınspeksııasynyń aıtýynsha, óńirde úsh deńgeıdegi balyq aýlaýǵa arnalǵan sý qoımalary bar. Halyqaralyq mártebesi bar Ertisten basqa 9 respýblıkalyq, jergilikti mańyzǵa ıe 265 sý qoımasy tirkelgen.
Bıyl óńirde zańsyz balyq aýlaýshylarǵa 800 myń teńgeden astam aıyppul salynyp, 65 ákimshilik hattama toltyrylypty. Ustalǵandardan 19 brakonerlik qural tárkilenip, 5 ákimshilik materıal oblystyń ákimshilik sottaryna jiberilgen.
Balyq sharýashylyǵy mamandary men ınspeksııa júrgizgen ıhtıologııalyq baqylaýlardyń nátıjesinde sý qoımalarynda balyqtardyń ýyldyryq shashýyna qolaıly jaǵdaılar jasalǵan.
Pavlodar
