Sanǵa emes, sapaǵa basymdyq berilmek

О́z sózinde Baýyrjan Baı­bek partııanyń sybaılas jem­qor­lyqqa qarsy kúresti odan ári kú­sheıtetinin aıtyp, bul jumysty eń aldymen uıymnyń óz ishinen bas­taıtynyn jetkizdi. Osy ret­te Mańǵystaý oblysynda keıbir bas­shylyq qyzmettegi adamdardyń sy­baılas jemqorlyqpen ustal­ǵany týraly derekterdiń bar ekenin atap ótken jón.

– О́ńirlik fılıaldyń bas­shy­lyǵy jemqorlyqqa qarsy kúres jónindegi qoǵamdyq keńesterdiń quramy men jumysyn júıeli qa­da­ǵalap otyrý kerek. Qazir partııa qataryn «tazalaý» jumystaryn júrgizemiz. Bul iste biz sanǵa emes, sapaǵa basa mán beremiz, – dedi partııa Tóraǵasynyń birinshi orynbasary.

Adamǵa laıyqty jaǵdaı ja­saý, onyń quqyqtary men erkin­digin qorǵaý, joǵary ómir súrý deńgeıin qamtamasyz etý – par­tııa jumysynyń negizgi basym­dyqtary. Sondyqtan Qazaq­stan Prezıdenti Qasym-Jomart Toqaevtyń saılaýaldy tuǵyr­na­masyn júzege asyrýda partııanyń róli erekshe.

Osy máselege nazar aýdarǵan partııa Tóraǵasynyń birinshi oryn­­basary basty mindet halyq­tyń senimin kúsheıtý ekenin sóz etti.

Sonymen birge jıyn bary­synda depý­tattyq saýaldar búkil qoǵamdy alańdatqan asa ózekti máselelermen úndesip, baılany­syp jatýy kerektigi, partııa osy baǵyttaǵy baqylaýdy kúsheıtýi tıis ekeni aıtyldy. Osy rette partııa Tóraǵasynyń biri­nshi orynbasary Mańǵystaý oblys­tyq máslıhatyndaǵy depýtattyq fraksııanyń jumysy kóńil kónshitpeıtinine nazar aýdardy.

– Jumys qorytyndysy boıynsha Mańǵystaý oblysy sońǵy eki jylda kósh sońynda qalyp keledi. Eger bizdiń depýtattar bel­sen­dilik tanytyp, ózekti másele­lerdi talqylap, halyqpen kezdes­pese, buqaralyq aqparat qural­dary men áleýmettik jelilerde sóılemese, qandaı qoǵamdyq senim týraly aıtýǵa bolady?! Partııa jar­ty jyldan keıin saılaýǵa kim­men barady?! Sondyqtan bul baǵytta Mańǵystaý oblysy tıim­di tetikterdi iske qosýy kerek, – dedi Baýyrjan Baıbek.

Sonymen qatar ol Elbasy, par­tııa Tór­aǵasynyń jańa kezeńde bastaýysh partııa uıymdarynyń jumysyn jandandyrý, halyq­pen keri baılanysty júıeli jolǵa qoıý, ár ótinishti nazardan tys qaldyrmaı, der kezinde áreket etýdi partııanyń aldyna mańyzdy mindetter retinde qoıyp otyrǵanyn aıtty.

– Partııa halyqtyń únin estı de, tyńdaı da bilý kerek. Sol se­bepti partııanyń qoǵamdyq qa­byldaý jumysyn kúsheıtýimiz qajet. Bul iste Mańǵystaý oblysynda ótinishterdi tirkeýde keshigý sııaqty máseleler bar. Son­dyqtan árbir kelip túsken ótinish mindetti túrde tirkelip, ol tolyǵymen oń sheshimin tapqanǵa deıin qatań baqylaýda bolýy tıis, – dedi partııa Tóraǵasynyń birinshi orynbasary.

Aıta keteıik, B.Baıbektiń qaty­sýymen ótken partııa oblys­tyq fılıalynyń konferen­sııa­synda Mańǵystaý oblysy­nyń ákimi Serikbaı Trumov partııa­nyń oblystyq fılıalynyń tóraǵasy bolyp saılandy.

Sondaı-aq Nur Otan partııasy Tóraǵasynyń birinshi orynbasary Baýyrjan Baıbektiń qatysýymen Qyzylordada Nur Otan partııasy oblystyq fılıa­lynyń kezekten tys ótken XXV konferensııasy ótip, onda úsh másele qaraldy.

Kún tártibindegi birinshi másele boıynsha Nur Otan partııa­sy oblystyq fılıalynyń jańa tóraǵasyn saılaýǵa Qyzylorda oblysynyń ákimi Qýanyshbek Ysqaqovtyń kandıdatýrasy usynylǵan bolatyn. Delegattar oblystyq partııa fılıalynyń jańa tóraǵasynyń kandıdatýrasyn biraýyzdan qoldady. Nur Otan partııasy Tóraǵasynyń birinshi orynbasary Baýyrjan Baıbek Qýanyshbek Ysqaqovty quttyqtap, kýálik tabys etti.

– Qýanyshbek Dosmaıylulyn jańa jaýapty qyzmetke taǵaı­yn­dalýymen quttyqtaımyn. Ol – osy óńirdiń týmasy, óz isiniń mamany, jaýapty qyzmetterdi atqarǵan tájirıbeli basshy. Qyrymbek Eleýuly Qyzylorda oblysynyń ákimi bolyp turǵan kezde kóp eńbek atqardy, Syr óńirin damytý úshin, onyń ishinde jańa jumys oryndaryn qurý, kásipkerlerdi qoldaý, mektepke deıingi bilim berý men tárbıemen qamtamasyz etý jáne taǵy basqa mańyzdy máseleler boıynsha kóp jumystar istedi. Qýanyshbek Dosmaıyluly da aımaqtyń áleý­mettik máselelerin ońtaıly sheshýde aıanbaı eńbek etedi dep se­nemin, – dedi B.Baıbek.

Kelesi másele boıynsha sóz alǵan partııanyń oblystyq fılıaly tóraǵasynyń orynbasary Erjan Baıtilestiń usynysymen oblys ákimi, partııanyń oblystyq fılıaly tóraǵasy Qýanyshbek Ysqaqov Saıası keńes bıýrosynyń múshesi boldy.

Baýyrjan Baıbek Nur Otan par­tııasynyń aldaǵy ýaqyttaǵy mindetterin belgilep, saılaýaldy shtabtyń jumysyna belsendi qa­tysqan partııa múshelerin Pre­zı­denttiń Alǵys hatymen marapattady.