Shilde aıy barysynda Aqtaý, Atyraý jáne Aqtóbe qalalaryndaǵy «Shattyq», «Radýga» jáne «Jiger» mekteptik jazǵy lagerleriniń oqýshylary áskerı bólimderge qonaq bolyp kelýde. Is-sharany uıymdastyrýshylar áskerılerdiń ómirimen ishten kórip baqylaý arqyly, óskeleń urpaqtyń boıynda patrıottyq sezim oıanyp, týǵan jerge degen maqtanyshy artyp, Otanyna qyzmet etýge daıyn bolýǵa tárbıeleıdi degen maqsat qoıypty. Is-sharanyń barysynda 300-den asa oqýshynyń áskerı bólimderge kelýi josparlanǵan.
Ashyq esik kúnderi barysynda oqýshylar áskerı ómirmen tanysyp, ofıserler men serjanttarmen suhbattasý barysynda ózderi úshin kóptegen qyzyqty derekter men málimetterdi aldy. Olar áskerge kelip túsken zamanaýı tehnıkalar men qarý-jaraq úlgilerimen tanysyp, áskerı qyzmetshilerdiń kásibı sheberlikterin óz kózimen kóre aldy. Sonymen qosa, olar sarbazdardyń úı-jaılaryn, oqý synyptaryn, sport qalashyqtary men ashanany aralap shyqty.
- Bizder búgin naǵyz áskerı qyzmetshilerdiń ómirimen tanysyp, olardyń qyzmetteriniń joǵary jaýapkershilik pen udaıy kásibı daıarlyqty qajet etetinine kózimiz jetti. Keleshekte mindetti túrde Otan aldymdaǵy boryshymdy abyroımen atqaryp, naǵyz er azamat atanýdy aldyma maqsat etip qoıdym, deıdi Aqtaý qalasynyń № 7 orta mekteptiń oqýshysy Amangeldi Izbasar.
Mańǵystaý oblysy
