Jaqynda Taldyqorǵan qalasy mańyndaǵy Qaratal ózenine batyp ketken 14 jasar qyz balany qutqarýshylar men eriktiler 6 kún boıyna izdep, súıegin ázer tapqan bolatyn. О́kinishtisi, qaıǵyly jaǵdaımen aıaqtalatyn mundaı oqıǵalar adamdardyń demalysy kezinde, belgilenbegen jerge sýǵa shomylýy barysynda bolyp jatyr eken. Buǵan deıin sol Qaratal ózinine taǵy bir jasóspirim sýǵa batyp, ata-anasynyń qolynda jantásilim etken-di. Qazir qutqarýshy mamandar men eriktiler demalýshylardy qaýipten saqtandyryp baǵýda. Alaıda, sýǵa shomylý maýsymy kezindegi kútpegen jaǵdaı azaıar emes.
Máselen, keshe basseındegi sýǵa batyp ketken jas jigit ajal aýzynan qaldy. Sýǵa tunshyǵyp, klınıkalyq ólim kúıine kóshken adamdy sol sátte basseınde demalyp júrgen dáriger baıqap qalyp, jedel kómek kórsetken. Nátıjesinde 17 jasar Nazım tiri qaldy. Osylaısha, Taldyqorǵan qalasyndaǵy «Tıýrkskıı dvorık» demalys alańyndaǵy basseınde sýǵa batqan 17 jasar jigitti oblystyq aýrýhananyń reanımatolog-anestezıolog dárigeri Ilııas Núsipalıev klınıkalyq ólimnen qutqaryp qaldy. Jumys ýaqyty aıaqtalǵan dáriger Ilııas Núsipalıev atalǵan demalys ornyna sýǵa túsýge barǵan eken. Sol ýaqytta jınalǵan jurt basseınnen es-tússiz kúıindegi Nazımdi taýyp alyp, ýlap-shýlap jatqan. Birden kómekke umtylǵan Ilııas demi shyqpaı qalǵan jigitke 7-8 mınýt boıyna reanımasııalyq kómek kórsetken.
- Sýǵa batqan adamdy qutqarý kezinde árbir mınýt qymbat. Eger birden kómek kórsetpeı, 3-4 mınýt joǵaltyp alsańyz, onda mıǵa, jalpy aǵzaǵa qan barmaı qalady. Júrekke massaj jasaý arqyly júrek soǵysyn qalpyna keltirgen soń esin jıdy. Jedel járdem kóligi kelgen soń qajetti em-shara qoldanyp, oblystyq aýrýhanaǵa jetkizildi, - deıdi oblystyq aýrýhananyń reanımatolog-anestezıolog dárigeri Ilııas Núsipalıev.
