Jol qaýipsizdigi qatań qadaǵalanady

Jol qaýipsizdigin qamtamasyz etý máselesi taqyrybynda ótken baspasóz jıynyna IIM Ákimshilik polısııa komıteti tóraǵasynyń orynbasary Álibek Keńisbaev pen IIM Polısııa aǵa ınspektory Aqtoty Boranova qatysty.

Aldymen Álibek Keńisbaev sóz alyp, 2019 jyldyń alty aıynda 7 093 jol-kólik oqıǵalary tirkelip, 850 adam qaza tapqanyn, 9 425 adam jaraqattanǵanyn aıtty. Bul kórsetkish ótken jyldyń sáıkes kezeńimen salystyrǵanda 5%-ǵa artqan. Ishki ister mınıstrligi jol ústindegi oqys jaǵdaılardyń aldyn alý maqsatynda júıeli túrde is-sharalar keshenin júzege asyryp jatyr eken. Eń bastysy, joldarda baqylaý kúsheıtilgen. Jyl basynan beri polısııa qyzmetkerleri jol erejesiniń buzylýyna qatysty 2,8 mln faktini tirkep, onyń ishinde 103,5 myń jaıaý adam ákimshilik jaýapqa tartylǵan. Sot 17,6 myń adamdy júrgizýshi quqynan aıyryp, 1 742 adamdy ákimshilik qamaýǵa alý týraly sheshim shyǵarǵan.

«3 shilde kúni ótkizilgen dóń­gelek ústelde avtokólikterdi ýaqyt­sha tirkeý máselesi qarasty­ryldy. Shetelden kelgen avto­kó­likterdi ýaqytsha tirkeý onlaın túrde 24 saǵatta tegin júrgiziledi. Osy máseleler oń sheshimin tapsa, bul baǵyttaǵy jumystardy odan ári jalǵastyramyz. Qazirgi tańda respýblıka kóleminde eshqandaı memlekettik organda sheteldik avtokólikterdi aıdaıtyn júrgizýshiler jóninde tolyq málimetter men naqty de­rekter joq. Sondyqtan ýaqyt­sha tirkeý tek joldaǵy qaýip­sizdikti emes, jalpy polısııa qyz­metkerleriniń qoǵamdyq qaýip­sizdikti qamtamasyz etýge ba­ǵyt­talǵan jumystardy atqarýǵa septigin tıgizedi dep senemiz», dedi Aqtoty Boranova.

Sonymen qatar jol qaýip­sizdigin kúsheıtýdiń bir ama­ly retinde tasjoldarda, respýb­lıkalyq mańyzy bar joldarda ortasha jyldamdyqty esepteý týraly usynys qarastyrylyp jatyr. IIM ókilderi bul bastamanyń qalaı iske asyrylatynyn da túsindirdi. Máselen, ortasha jyl­damdyqty belgileý úshin avtokólik A núktesinen shyqqan kezde onyń memlekettik nómiri, ýa­qyty tirkeledi. Odan soń B núktesine deıingi jol uzaqtyǵy onyń ýaqytyna bólinedi. Eger avtokólik belgilengen jyldam­dyqty asyratyn bolsa nemese shamalanǵan ýaqyttan erte ke­letin bolsa, júıe avtomatty túrde onyń jyldamdyqty asyryp basqarǵanyn anyqtap beredi. Bul usynys maquldanatyn bolsa, 592-baptyń bólikterine óz­ge­rister engizilip, ortasha jyl­dam­dyqty asyrǵandar ákimshilik jaýapkershilikkke tartylady.