Aqtaý bıtým zaýyty 2013 jylǵy jeltoqsan aıynda paıdalanýǵa berildi jáne tehnıkalyq sıpattamalary boıynsha sapasy joǵary jol bıtýmyn shyǵarý úshin eń ońtaıly shıkizat bolyp tabylatyn «Qarajanbas» ken ornynyń munaıyn jylyna 1 mln tonnaǵa deıin óńdeı alady.
Zaýyt jumysynyń nátıjesinde jáne basqa otandyq óndirýshilerdiń ónimin qosa alǵanda, búginde eldiń jol bıtýmyna degen qajettiligi tolyq qamtylyp otyr. Salystyratyn bolsaq, 2013 jyly Qazaqstanǵa ákelinetin bıtým ımporty 200 myń tonnadan astamdy qurady. 2018 jyly zaýyt ónimi eldiń ishki naryǵy qajettiliginiń 37%-yn qamtamasyz etti.
Qazirgi ýaqytta Aqtaý bıtým zaýytynda joǵary sapaly, onyń ishinde buǵan deıin Qazaqstanda shyǵarylmaǵan polımerli-túrlendirilgen bıtým óndiriledi. Polımerli-túrlendirilgen bıtým jylýǵa, aıazǵa jáne tozýǵa tózimdiligi boıynsha jaqsartylǵan sıpattamalary esebinen asfalt-betondyq jabyndylar qyzmetiniń merzimin 1,5-2 esege uzartady.
«QazMunaıGaz» UK AQ munaı óńdeý jónindegi basqarýshy dırektory Muratjan Musaıbekov zaýyt iske qosylǵan ýaqyttan bastap 3,52 mln. tonna munaı óndirilip, 1 mln. tonnadan astam jol bıtýmy nemese 3 500 shaqyrymǵa jýyq jol shyǵarylǵanyn atap ótti. Aqtaý bıtýmy Qazaqstan Respýblıkasynyń barlyq derlik strategııalyq avtojoldaryn, onyń ishinde «Batys Eýropa – Batys Qytaı» tas jolynyń qurylysy kezinde paıdalanyldy. Aqtaý zaýytynyń bıtýmy barlyq kórsetkishteri boıynsha memlekettik jáne halyqaralyq standarttardyń talaptaryna sáıkes keledi.
Mańǵystaý oblysy
