Túrkistan oblystyq máslıhattyń kezekten tys qyryq birinshi sessııasynyń jumysynda osyndaı derekterdi keltirgen óńir basshysy О́mirzaq Shókeev Prezıdent baqylaýynda turǵan Túrkistan men Arys qalasyndaǵy qurylys jumystarynyń qarqyny báseńdemeıtinin málimdedi. «Bıyl ákimshilik-iskerlik ortalyqta 7 nysan paıdalanýǵa beriledi dep josparlanǵan. Al rýhanı-mádenı ortalyǵynda 11 nysannyń 4-eýi jyl sońyna deıin tapsyrylady», – degen óńir basshysy Arysty qalpyna keltirý máselesi de basty nazarda ekenin aıtty. Búginde Arys qalasynda 5 646 turǵyn úıdi qalpyna keltirý jumystary bastalyp, onyń 1100-den astamy qalpyna keltirilgen, 3 turǵyn úıdiń qurylysy jańadan júrgizilip aıaqtaldy. Jyl basynan bergi atqarylǵan jumystar jóninde baıandaǵan oblys ákimi 43 eldi meken ortalyqtandyrylǵan aýyz sý qubyrymen qamtamasyz etilgenin, aýyl sharýashylyǵy salasynda tamshylatyp sýarý, jylyjaı sharýashylyǵyn qurý sııaqty tıimdiligi zor tájirıbeler engizilip jatqanyn atap ótti. «Aýyl - el besigi» jobasy boıynsha 7 eldi mekenniń áleýmettik - ekonomıkalyq jaǵdaıdyń jaqsartý maqsatynda 89 jobaǵa 4 mlrd. teńge bólingen. «Kúz aılarynda aýdan ortalyqtary men baǵdarlamaǵa engen eldi mekender jańaryp qaıta túleýi kerek», - dedi oblys ákimi.
Túrkistan oblysy bıznesti damytý boıynsha óńirlerdiń arasynda ekinshi orynda tur. Investısııa kólemi 39 paıyzǵa ósken. Sondaı-aq, oblys damýyndaǵy basym baǵyttardyń biri týrızm bolyp otyr. Týrızmniń zııaratshylyq, arheologııalyq, tabıǵatty tamashalaý, taý shańǵysy sııaqty salalaryn damytý josparda bar. О́ńirde bala-baqshamen qamtý kórsetkishi 96 paıyzǵa jetip otyr. 1-shildege deıin áleýmettik jaǵdaıy tómen 71 myńǵa jýyq otbasyǵa ataýly áleýmettik kómek taǵaıyndalǵan. Oblys bıýdjetiniń jalpy kólemi 682,8 mıllıard teńge, alty aıda bıýdjet qarjysy 99 paıyzǵa ıgerilgen. «Investısııa kólemin bıyl 20 paıyzǵa arttyrýymyz qajet. Sondaı-aq «Qarapaıym zattar ekonomıkasy» baǵdarlamasy aıasynda, jıhaz, tamaq, toqyma salalary boıynsha iske asyrylatyn jobalardy kóbeıtip, jańa jumys oryndaryn qurýymyz kerek. Kásipkerlerge jan-jaqty qoldaý kórsetip, memlekettik-jekemenshik áriptestikti damytatyn bolamyz», – dedi oblys ákimi. Sondaı-aq oblys ákiminiń aıtýynsha, tıisti mekemelerge aýyl sharýashylyǵy jer telimderine aýdıt júrgizý jáne jer kadastrynyń aqparattyq júıesin sıfrlandyrý, bıýdjet qarjysyn qadaǵalaý, memlekettik mekeme basshylarynyń jaýapkershiligin kúsheıtý júktelgen. Árbir tapsyrmanyń oryndalýy boıynsha qadamdyq jol kartasy ázirlenip, oryndalý merzimi, atqarýshy organdar men olardyń jaýapty mamandary bekitilmek.
Túrkistan oblysy
