Qazaqtaný – bir týdyń astyna birigý

Qarashańyraqtyń ıesi qazaq halqynyń tarıhyna, tiline, salt-dástúrine zor qurmetpen qaraý – Qazaqstandaǵy jalpyulttyq birliktiń uıytqysy. Osyndaı qun­dy­lyqtardy dáripteıtin «Qazaq­­taný» ǵylymı-aǵartý­shy­lyq jobasynyń tusaýkeseri Elbasy Nursultan Nazarbaevtyń bastamasymen Qazaqstan halqy Assambleıasynyń XXVI sessııasynda jasaldy.

Atalǵan jobanyń aıasynda elordalyq QHA ǵylymı-praktıkalyq konferensııa uıym­dastyrdy. Bul is-sharaǵa mem­lekettik qaıratkerler, Par­la­menttiń depýtattary, Nur-Sultan qalasyndaǵy etnomádenı birles­tikterdiń ókilderi, sarapshy­lar jáne jastar qatysty. Konferensııa bastalmastan buryn ǵımarat ishindegi qazaqtyń kıiz úıinde barlyq etnos ókilderi bir shańyraqtyń astyna jınaldy. Kıiz úıge jıylǵan aǵaıyn berekeli das­tarqannan dám tatyp, Abaıdyń ǵıbratqa toly án-jyrymen qulaq quryshyn qandyrdy.

Alqaly jıynda alǵashqy bolyp Nur-Sultan qalasy ákiminiń orynbasary Baqtııar Máken sóz aldy. Ol «Yntymaqty eldiń yrysy mol» degen ataly sózge súıenip, aýyzbirligi men tatý tirligi jarasqan elimizdiń óńir-óńirinde «Qazaqtaný» jobasy sátti júzege asyp jatqanyn aıtty.

Al QHA tóraǵasynyń orynbasary Janseıit Túımebaev jobanyń Qazaqstanda ómir súrip jatqan etnostar arasynda qazaq halqynyń mádenıetin, tarıhyn, fılosofııasyn jáne rýhanı qundylyqtaryn nası­hat­taýǵa arnalǵanyn aıtyp, bul urpaqtar sabaqtastyǵynyń kók­jıe­gin keńeıtip, Otanǵa degen súıispenshilikti tereńdete túsetinin atap ótti.

– Byltyr «Qazaqtaný» joba­sy­nyń aıasynda respýblıkalyq deńgeıde Aqmola, Qyzylorda, Qostanaı jáne Atyraý oblys­tarynda is-sharalar uıym­das­ty­ryldy. Bul bastamaǵa «Kıeli Qazaqstan», «Memleket tarıhy ınstıtýty», sondaı-aq QHA-nyń ǵylymı-saraptamalyq keńesi atsalysty. Jalpy, atalǵan jobanyń aıasynda 300-ge jýyq is-shara ótip, barlyǵy 192 myń adam qatysty. Onyń ishinde Abaı muralaryn dáripteıtin dúnıeler de bar. Kelesi jyly hákim Abaı Qunanbaıulynyń 175 jyldyq mereıtoıy atalyp ótpek. Ataýly sharaǵa degen qurmet pen iltıpattyń izgilikteri osy jyldan bastaldy. «Qazaqty tanyǵyń kelse, Abaıdy oqy» degen ustanym qalyptasqan. Bul beker aıtylǵan sóz emes, – dedi J.Túımebaev.

Budan keıin sóz alǵan Parla­me­nt Májilisi tóraǵasynyń oryn­basary Vladımır Bojko qazir memlekettik apparatta qazaq tiliniń deńgeıi tómen ekenin aıtyp, qazaq patrıotızmine negiz­delgen birlikti nyǵaıta túsý úshin memlekettik tildiń qadi­rin arttyrý kerektigine basa mán berdi.

Basqosý sońynda qatysý­shy­lar jobany odan ári ilgeriletý maq­satynda joǵary oqý oryndarynda «Qazaqtaný» pánin engizý, Dostyq úılerinde qazaq qolónerine baýlıtyn úıirmeler uıymdastyrý sııaqty bastamalar kóterdi.