Atalǵan jıynda Azamattyq alıanstyń vıse-prezıdenti Ǵamal Túzelbaev pen Aqparat jáne qoǵamdyq damý mınıstrliginiń Azamattyq qoǵam isteri jónindegi komıtetiniń tóraıymy Álııa Ǵalymova BAQ ókilderine elimizdegi qoǵamdyq keńesterdiń qyzmeti týraly birsypyra maǵlumat berdi.
Jarııa bolǵan málimet boıynsha, bıyldan bastap qoǵamdyq keńesterdiń ekinshi quramy jasaqtaldy. Alǵashqy quramy 2016-2018 jyldary jumys istedi. Búkil Qazaqstan boıynsha 231 qoǵamdyq keńes bar. Onyń ishinde 15-i respýblıkalyq deńgeıde, 17-si oblys ortalyqtary men Nur-Sultan, Almaty jáne Shymkent qalalarynda, 199-y qala men aýyldyq deńgeıde qurylǵan. Qoǵamdyq keńesterdiń músheleri – 3570 adam. Onyń 3305-i – óńirlerdegi qoǵamdyq keńestiń ókilderi. Qalǵan 265-i ortalyq memlekettik organdarda jumys istep jatyr.
– Qoǵamdyq keńester qurylǵaly beri azamattardy memlekettik sheshimderge tartýǵa atsalysyp keledi. Bul Azamattyq alıanstyń da negizgi mindetteriniń biri boldy. Osy baǵyttaǵy jumysta bizdi basynan bastap Aqparat jáne qoǵamdyq damý mınıstrligi qoldap keledi. Bıyl Azamattyq bastamalardy qoldaý ortalyǵy grant bólip, qarjylandyrýymen biz qoǵamdyq keńesterdiń qyzmetine baılanysty keshendi baıandama jasaǵaly otyrmyz. Qoǵamdyq keńester memlekettik qyzmetterdi qadaǵalaýda óz ádildigin kórsetti. Endi bul ınstıtýttyń qazirgi jaı-kúıi men aldaǵy damý baǵdaryn aıqyndaý úshin arnaıy keshendi baıandama ázirleımiz. Sol arqyly qoǵamdyq keńesterdiń atqarǵan qyzmetteri halyqqa keńinen málim bolady. Biz qazirden bastap qoǵamdyq keńesterdiń jumysyn zertteýge kirisip kettik, – dedi Ǵamal Túzelbaev.
Onyń aıtýynsha, zertteý jumystarynyń negizgi kezeńi qyrkúıek aıyna deıin júrgiziledi. Barlyq óńirde dóńgelek ústel jıyndary ótedi. Bul jumystar saýaldama júrgizý, saraptamalyq saýaldama jáne kabınettik zertteý ádisteri arqyly oryndalady. Saýaldamaǵa 3176 adamdy tartý josparlanyp otyr eken. Olar – 18 ben 60 jas aralyǵyndaǵy Qazaqstannyń belsendi azamattary. Respondentterdiń 35%-y qoǵamdyq keńesterdiń músheleri bolmaq. Qalǵan bóligin qoǵam belsendileri, sarapshylar jáne ÚEU ókilderi quraıdy. Budan soń jınalǵan aqparattardy óńdeý, túsindirý jáne taldaý kezeńi qazan aıyna deıin sozylady. Al zertteý jumystarynyń qorytyndysy retinde ázirlengen keshendi baıandama qarasha aıynda kópshiliktiń nazaryna usynylady.
Azamattyq qoǵam isteri jónindegi komıtet tóraıymy Álııa Ǵalymova qoǵamdyq keńesterdiń qyzmetin uıymdastyrý jáne qarjylaı qamtamasyz etý máseleleri sheshimin tapqanyn aıtyp, olardyń derbestigin qalaı arttyrý kerektigine toqtaldy.
– Aqparat jáne qoǵamdyq damý mınıstrligi Azamattyq alıanspen birlesip, qoǵamdyq keńesterdiń jumysyn jetildirý maqsatynda birneshe baǵyttar boıynsha jumys isteýde. Eki jylda bir ret qoǵamdyq keńesterdiń basyn qosatyn úlken jıyn respýblıkalyq májilisi ótkiziledi. Birinshi májilis 2017 jyly uıymdastyrylsa, ekinshisi bıyl aqpanda ótti. Onda qoǵamdyq keńesterdiń ozyq tájirıbeleri, keńester jumysyn damytýǵa qatysty usynystar talqylandy. Sonyń biri – qoǵamdyq keńesterge qatysty zańnamany jetildirý. Túzetýlerdiń negizgi paketin kúzde Úkimet pen Parlament Májilisine usynýdy josparlap otyrmyz. Biz qoǵamdyq keńesterdiń derbestigin arttyrýǵa yqpal etetin kóptegen jańa tetikterdi qostyq. Qoǵamdyq keńes músheleriniń saılanýyn anyqtaıtyn organ retinde jumys toby isteıdi. Buryn mundaı jumys tobyna memlekettik organnyń basshysy jetekshilik etse, qazir azamattyq qoǵamnyń ókilderi ózderi basqarady. Zań jobasymen qatar qoǵamdyq keńes músheleri úshin jańa quqyqtar men ókilettikter engiziledi, – dedi Álııa Ǵalymova.
Sonymen qatar ol qoǵamdyq keńester qandaı normatıvtik-quqyqtyq aktilerdiń jobalaryn qarastyra alatynyn ózderi sheshetinin atap ótti. Buǵan qosa qoǵamdyq keńesterdiń usynystarynyń oryndalý máselesi de bir jolǵa qoıylady. Endi memlekettik organdardyń usynystarǵa bir aıdyń ishinde dáleldi jaýap berýi tıis ekendigi kórsetilgen norma engiziledi. Azamattyq qoǵamnyń pikirine negizdeletin qoǵamdyq keńesterdiń qyzmeti týraly keshendi baıandama atalǵan baǵyttaǵy jumystardy ilgeriletýde birqatar máseleniń basyn ashpaq.
