Koreı ashanasy elordada

Ońtústik Koreıa bas aspazdar keńesiniń tóraǵasy, áıgili aspaz Han Chýl Be Koreı taǵamdaryn damytý ınstıtýtynyń halyqaralyq baǵdarlamasyn júzege asyrý maqsatymen álemniń kóptegen elderin aralap, shákirt tárbıelep júr. Byltyr Phenchhanda ótken Qysqy Olımpıada oıyndary VIP zalynyń bas aspazy bolǵan ol Qazaqstandy ekinshi ret tańdap otyr. «Mundaı sheberlik sabaǵyn osynda byltyr da ótkizgenbiz. Qazaqstandyqtardyń koreı taǵamdaryna degen qyzyǵýshylyǵy men aspazdardyń qaǵylezdigi meni Nur-Sultan qalasyna ekinshi ret alyp keldi. Bul joly koreıalyq úsh tanymal shákirtimdi ala kelip, 20 aspazǵa koreı taǵamdaryn daıyndaýdyń qyr-syrymen bólisip jatyrmyn. Onyń ishinde ystyq, sýyq jáne tátti taǵamdar da bar», deıdi Han Chýl Be.

Koreı taǵamdaryn has sheberdiń ózinen úırený oraıyna ıe bolǵan bas qala aspazdary qýanyshtaryn jasyrmady. «Kez kelgen aspaz búkil álemniń taǵamyn pisirýdi úırengisi keledi. Koreı taǵamdarynyń dámin dál ózderindeı etip daıyndaý ońaı emes. Olar tamaqqa shópter men shóptiń tamyrlaryn kóbirek qosady. Mysaly ózim jenshenniń dámin birinshi ret tattym. Biraq Han Chýl Be ustaz bizge óte muqııattylyqpen úıretýde. Osyndaı tanymal aspazdan sabaq alǵanyma qýanyshtymyn. Aldaǵy ýaqytta úırengenimizdi ózimizdiń as mázirimizge qosýǵa kúsh salamyz», deıdi Astana Marriott qonaqúıiniń aspazy Nurlybek Balabek.

Festıval kezinde Han Chýl Beniń qolynan shyqqan qaraqumyq quımaǵy, mergıa (jenshen) qosylǵan taýyq sorpasy, kókónis qosylǵan pıbımpab, sýe-kalbıgýı, chapche qatarly bir qansha mázir jelisiniń dámin tańdap tatýǵa múmkindik bar. «Men Shyǵys taǵamdaryn súıip jeımin. Sonyń ishinde koreı asyn aıryqsha jaqsy kóremin. Koreıalyq áıgili aspaz Han Chýl Beniń qolynan byltyr da dám tatqanmyn. Bıylǵy as máziri de meniń erekshe kóńilimnen shyqty. Dámi til úıiredi», deıdi astanalyq Symbat Ibragımova.

Taǵam mádenıetin ǵasyrdan-ǵa­syrǵa shyp-shyrǵasyn shyǵarmaı jal­ǵap kelgen koreılikterdiń bul isi bizdi de tánti etti. Búgin sol eldiń tany­mal tamaǵyna tamsansaq, erteń saıa­hattap baryp óz qoldarynan dám  tatýǵa tyrysatynymyz anyq. «Ulttyq taǵamymyzdy óz elimizde durys ulyq­taı almaı otyrǵan biz as-sýyn alys-jaqyn shetelderge úıretip, tanytyp júrgen memleketterdiń qarasyna qashan ilesedi ekenbiz» degen kúpti oı kóńilde qaldy...