Qanysh Nurtazınov Qaraǵandy oblysy Ulytaý aýdany Qoskól aýylynda týyp-ósken. Áskerde otan aldyndaǵy boryshyn ótegen soń týǵan aýylyna oralady. 2012 jyly ol Qoskól aýylynda ýchaskelik ınspektor bolyp qyzmet etti. 2016 jyldan beri «Ohotzooprom» ınspektory bolyp, vahtalyq ádispen jumys istegen.
Jubaıy Saılaýkúl aýyldyq kitaphanada jumys isteıdi. Marqumnyń sońynda 5 balasy qaldy, úlken qyzy - 20 jasta, al kenjesi - 3 jasta. Qoskól aýylynda qaıtys bolǵan ınspektordyń aǵasy turady, buǵan qosa onyń inisi jáne eki qaryndasy bar. Marqumnyń qart anasy Keńgir aýylynda turady.
«Qoskól aýylynyń halqy Qanysh Nurtazınovtyń qaıtys bolǵanyn estigende qatty qaıǵyrdy. Sebebi ony bári óte jaqsy kóretin jáne qurmetteıtin. Ol meıirimdi, jaýapty adam edi. Kómek surap kelgenderge árdaıym qol ushyn sozýǵa daıyn bolatyn», deıdi Qoskól aýylynyń ákimi Doset Ýataev.
Aýyl turǵyndary marqumnyń otbasyna jerleýge qajetti kómekti kórsetýde.
«Bizdiń aýyl óte kishkentaı, biraq soǵan qaramastan aýyldyń árbir turǵyny óz úlesin qosyp, jerleýdi uıymdastyrýǵa kómektesip jatyr», dedi aýyldyq okrýg basshysy.
Ázirge marqumnyń denesi týǵan aýylyna jetkizilmegen. Aldyn ala málimet boıynsha, máıit 25 shildede ákelinedi. Al 26 shilde, juma kúni Jezqazǵan qalasynda marqumnyń janazasyn shyǵarý rásimi ótedi. Qanysh Nurtazınovty týystary Qoskól aýylynda jerlemek.
Aıta keteıik, osyǵan deıin habarlaǵanymyzdaı, 23 shildede shamamen saǵat 11.00-de «Ohotzooprom «О́B» RMQK Ortalyq óńirlik fılıalynyń ınspektorlary Aqmola oblysy Jarqaıyń aýdanynda kıik atqandardy anyqtaıdy. Brakonerler izine túsken eki ınspektorǵa qarsy oq atady, saldarynan 1976 jylǵy ınspektor kóz jumdy, al, onyń 1975 jylǵy áriptesi jaralanyp, Jarqaıyń aýdandyq aýrýhanasyna jatqyzylǵan edi.
Osyǵan oraı, arnaıy jedel-tergeý toby qurylyp, kúdiktilerdi ustaý boıynsha keshendi sharalardy qolǵa aldy. Artynsha bul isti Ishki ister mınıstri men Aqmola oblystyq PD basshysy baqylaýyna aldy.
Sonymen qatar, atalǵan oqıǵaǵa baılanysty QR QK 99-babynyń 1-bóligi boıynsha qylmystyq is qozǵaldy. Jedel izdestirý barysynda kúdiktiler - Arqalyq qalasynyń 45 jastaǵy turǵyny men onyń 20 jastaǵy balasy ustaldy.
