Naqtyraq aıtsaq, Qyrǵyz eliniń Batken oblysyndaǵy Aq-Saı aýyly men Tájikstannyń Vorýh anklavynyń shekarasynda kıkiljiń shyqty. Qyrǵyz shekarashylarynyń málimetinshe, Vorýh turǵyndary aýylǵa kire beriste flagshtok ornatqan kezde janjal shyqqan, sońy qarýly qaqtyǵysqa jalǵasqan. Shekarashylar aýyl turǵyndary ańshy myltyǵynan oq atqan dep otyr.
Al Tájikstan tarabynyń málimeti basqa. Olardyń sózine sensek, janjal barysynda qyrǵyz aýylynyń azamattary oq atqan. Tájikstan Ishki ister mınıstrliginiń aqparatynsha, tájikstandyq bir azamat qaza bolyp, tájik mılısııasynyń podpolkovnıgi jaralanǵan. Zardap shekken on adamnyń úsheýine oq tıgen, jeti azamat tıgen tastan jaraqat alǵan. Qyrǵyz jaǵynan 15 adam jaralanǵan, onyń 12-sine oq tıgen, úsh adam tastan zardap shekken. Jaralanǵandar arasynda mılısııa qyzmetkeri men shekarashy bar kórinedi.
Al 23 shilde kúni taǵy da atys bolyp, bir shekarashy jaralandy. Aımaqta shekara qyzmeti kúsheıtilgen tártipke kóshti. Qazir Isfara – Vorýh joly jabyldy. Tájik jaǵy Leılek aýdanyna aparatyn Isfana-Batken jolyndaǵy qozǵalysty da toqtatty. Qyrǵyz eline qarasty Batken aýdanyndaǵy Aq-Saı aýylynan 315 adam basqa jerge kóshirildi.
Jalpy qos eldiń arasyndaǵy shekarada mundaı qaqtyǵystar jıi tirkelip turady. Bıyl naýryz, maýsym aılarynda da osyndaı oqys oqıǵalar bolǵan edi. Onyń sebepteri de bar: eki taraptyń halqy sý, jer, jaılaýdy bólise almaı qalady. Qantógiske deıin jetken kezder de barshylyq. Áli anyq shekara syzylmaǵan ári daýly jer dep Tájikstannyń Bobodjon-Gafýrov jáne Isfarın aýdandary men Qyrǵyz Respýblıkasynyń Leılek jáne Batken aýdandary shektesken terrıtorııa esepteledi. Eki el arasyndaǵy shekaranyń jalpy uzyndyǵy 970 shaqyrym, onyń tek 519 shaqyrymy boıynsha eki el arasynda kelisim jasalǵan.
Shekaradaǵy janjal Qyrǵyz eliniń prezıdenti Sooronbaı Jeenbekovtiń Tájikstanǵa sapary qarsańynda shyqty. Osy kezdesýde qos tarap shekaranyń áli belgilenbegen bóligin, joǵaryda atalǵan janjaldardy talqylaýy múmkin.
