Bılik pen buqara arasyndaǵy dıalogty damytady

Búginde bılik pen buqara arasyndaǵy dıalogtyń dińgegi bo­latyn Ulttyq qoǵamdyq se­nim keńesiniń baǵyty aıqyn­da­lyp, jumysy birshama júıe­lendi. Jaqynda Memleket bas­shysy Qasym-Jomart Toqaevtyń Jarlyǵymen Keńes­tiń erejesi men quramy bekitil­di. Mártebesi Qazaqstan Respýb­lı­kasynyń Prezıdenti janyn­daǵy konsýltatıvtik-keńes­shi organ bolyp naqtylanǵan Ke­ńestiń negizgi mindeti – tujy­rym­damalardyń, memlekettik baǵdarlamalar men normatıvtik-quqyqtyq aktilerdiń jobalaryna qoǵamdyq saraptama júrgizý, jurtshylyqtyń, azamattyq qoǵamnyń pikirin eskere otyryp, mańyzdy strategııalyq problemalardy qaraý, taraptar arasynda syndarly dıalogty qamtamasyz etý.

Quramy 44 adamnan ja­saq­talǵan Ulttyq keńeske Prezı­d­enttiń ózi tóraǵalyq etedi. Bul atalǵan keńeske degen kóp­shiliktiń senimin arttyra tústi. О́ıtkeni Memleket basshysy saılaýaldy tuǵyrnamasynda ashyq jáne ádil jumysty ilgeriletýge erekshe mán berip, keńes atqarýshy bılik pen qoǵam arasyndaǵy alshaqtyqty qysqartatyn kópir bolatynyn aıtqan. Prezıdent halyqty tol­ǵandyryp otyrǵan basty máse­le tabys kóleminiń azaıýy eke­nin, basqa da ózekti másele­lerdi aıqyn kórip otyrǵanyn má­limdedi. Bul oıyn keıin sheteldik tanymal buqaralyq aqparat quraldaryna bergen suhbattarynda qýattady. Endi jańadan qurylǵan Keńes arqyly Memleket basshysynyń tikeleı qadaǵalaýymen talaı máseleniń basy ashylyp, shıelenisken jaǵdaılardyń sheshimi qarastyrylady. Ol úshin keńeske múshe bolǵan halyqtyń sózin sóıleı alatyn, únin jetkize alatyn qoǵam belsendileri óz múmkindikterin barynsha paıdalaný kerek. Keńes quramyna osy ýaqytqa deıin jurtty tolǵandyrǵan máselelerdi udaıy kóterip júrgen, kópshiliktiń senimine ıe bolǵan azamattar kirdi. Pre­zıdent Ákimshiligi ókilderi túrli qoǵam qaıratkerlerimen, saıa­sat­kerlermen, sarapshylarmen, azamattyq sektor ókil­derimen kezdesý ótkizip, tıisti kon­sýltasııalardyń nátı­jesinde Keńestiń múshe­lerin iriktedi.

Keńes quramynyń naqty­la­nýymen halyqqa bul dıa­log alańynda kóteriletin máse­leler men usynystardyń birsypyrasy málim bolyp qaldy. Sebebi Keńes múshe­leriniń kóbiniń qozǵap júrgen problemalarynan jurt habardar. Ol azamattar Ulttyq keńes quramy bekitilgen Jarlyq shyqqannan keıin de baspasóz betterinde jáne áleýmettik jeliler arqyly buryn da aıtyp júrgen taqyryptaryn atalǵan alqaly toptyń ortasyna salatyndaryn jetkizdi. Buǵan qosa Keńes músheleriniń qatysýymen birli-jarym basqosýlar da uıym­dastyryldy. Ún qat­qan qo­ǵam belsendileriniń málim­de­melerinen Keńeste talqyla­natyn máseleler men usy­nys­tar birneshe taqyryptardy qamtıtynyn baıqaýǵa bolady. Máselen, Keńes múshesi, Ulttyq «Serpin» bilim jáne ınnovasııa­lar palatasynyń prezıdenti Murat Ábenov: «Bilim salasy, medısınany kóterý, jastardyń problemasy sııaqty máselelerdi jıi kóteretinin aıtyp, osy bir­qatar áleýmettik saladaǵy jaǵdaılardyń rettelýi úshin utymdy usynystar jasaýǵa tyrysatynyn jetkizdi.

Al taǵy bir keńes múshesi, Qa­zaqstan Ulttyq arhıviniń «Ar­hıv-2025» ǵylymı-ádiste­melik ortalyǵynyń basshysy Berik Ábdiǵalıuly: «Meniń oıymsha, bul keńes Prezıdent janyndaǵy konsýltatıvti-keńesshi organ retinde saıası reformalar, áleýmettik, ekonomıkalyq jaǵdaılarǵa qatysty qajetti ári elimizdiń damýyna mańyzdy usynystar berip otyrady. Jeke ózim rýhanııat, ulttyń damýy, jergilikti memlekettik basqarý, onyń ishinde aýyl máselesi, ákimderdiń jumysy, óńirlik saıa­satpen baılanysty tájirıbem men usynystarymdy bólisemin dep oılaımyn», dep pikirin bildirdi.

Sondaı-aq keńes múshesi, Ká­sipodaqtar federasııasy tór­aǵasynyń orynbasary Erlan Saırov saılaý, mıtıng, BAQ jáne saıası partııalar týraly zańdardyń keıbir tarmaqtary zaman talabyna saı emes eke­nin aıtady. Buǵan qosa ol Qazaq­stannan óz erkimen kóship jatqan­dardyń sany kóbeıip jatqa­nyna kóńil aýdaryp: «Meni ma­zalaıtyn suraqtardyń biri – shekara jaǵdaıy. Shyǵys­taǵy Katonqaraǵaı, Marqakól, Aq­sýat, Maqanshy óńirlerinen halyq údere kóship jatyr. My­saly, burynǵy Marqakól aýdanynda osydan 30 jyl buryn 27 myń adam turǵan. Qazir aý­dandaǵy turǵyndardyń sany – 6 myńǵa jeter-jetpes. Muny gýmanıtarlyq problema dep te ataýǵa bolady. Dál osyndaı jaǵdaı Almaty oblysynda da bar. Bul máseleni sheshý úshin kezinde qysqaryp qalǵan aýdandardy qaıta qurý qajet. Sodan keıin shekaralyq aımaqtardy damytý jónindegi memlekettik baǵdarlama jasaý kerek» degen oıyn jetkizdi.

Sonymen qatar Ulttyq ke­ńeste jer máselesi de qara­lady. Bul týraly Premer-Mı­nıstrdiń orynbasary Jeńis Qasymbek Úkimette málimdep, atalǵan máseleni qoǵammen talqylaý úshin óńirlerge saparlaý kestesi bekitilgenin, jyl so­ńyna qaraı Ulttyq keńeske usynylatynyn aıtty. Aýyl sharýashylyǵy jerlerin satý jáne jalǵa berý, moratorıı máselesi áleýmettik jelilerde de keńinen talqylana bastady. Bul jaǵdaıdy Ulttyq keńes oty­rysynda kóterýdi birneshe aza­mat áleýmettik jelilerde ke­ńeske múshe bolǵan qoǵam bel­­sendilerinen surady. Osy tur­­ǵyda Prezıdent keńesshisi Er­­lan Qarın kezindegi Jer ko­mıs­sııasyna qaraǵanda Ult­tyq qoǵamdyq senim keńesi ál­de­qaıda aýqymdy ekenin, bul dıalog alańynda bir emes, bir­neshe ulttyq máseleler talqy­la­natynyn aıtty.