Qazirgi kezde «Jas kásipker» jobasynyń alǵashqy legine qatysýǵa myńnan 1200-ge jýyq almatylyqtar tilek bildirgen. Endigi kezekte joǵaryda atap ótken sanattaǵy usynystarmen qatar mektep, kolledj jáne ýnıversıtetter túlekteri arnaıy testileýden ótetin bolady. Joba jetekshisi Qýanyshbek Ernııazovtyń aıtýynsha, joba Almaty qalasymen qatar elimizdiń barlyq óńirlerinde ótetin bolady. «Bastaý» jobasynyń negizinde qolǵa alynǵan baǵdarlama 18-29 jas aralyǵyndaǵy qyz-jigitterge baǵyttalyp otyr. Almaty qalasy boıynsha «Jas kásipker» baǵdarlamasy boıynsha oqytylatyndar sany jeltoqsan aıyna deıin 3200 bolsa, «Bastaý» baǵdarlamasy boıynsha 6400 adamdy oqytý josparlanǵan. Jobaǵa qatysqan túlekter ózderiniń iskerlik daǵdylaryn damytý arqyly bıznes jospar ázirleıtin bolady. Osy bıznes jospar arqyly jobaǵa qatysýshy jastar óz bıznesin ashýǵa grant túrinde bastapqy 200 AEK (505 myń teńge) – 8000 AEK-ke deıin 6 paıyzben jeńildetilgen nesıe alady. Barlyq qatysýshylarǵa 19 753 teńge shákirtaqy tólenedi. Qazirgi kezde jobaǵa Almatydaǵy 8 aýdan qamtylyp, 32 synyp ashylǵan.
«Jas kásipker» jobasynyń ekinshi kezeńi aǵymdaǵy jyldyń 21 tamyzynda bastalady. Qazirgi kezde jobanyń ekinshi kezeńine qujattardy qabyldaý jumystary júrgizilýde. Qatysýshylar jeke kýáliginiń kóshirmesin, meken-jaı anyqtamasy jáne jobaǵa qatysý týraly ótinimin (egov.kz) tapsyrýy qajet.
Qujattardy qabyldaý Almaty qalasynyń Kásipkerler palatasy (Jibek joly kóshesi, 135, Amangeldi kóshesiniń qıylysy, 2-blok, 8-qabat) jáne http://atameken.kz/kk/news/32541-v-almaty-ob-yavlyaetsya-nabor-uchastnikov-na-proekt-zhas-kspker siltemesi boıynsha júrgiziledi.
ALMATY
