Qazirgi qoǵamdy ókshelep kele jatqan ózekti máseleniń biri – týǵan balasynan bas tartyp, alıment tóleýden qashý. Alıment tólegisi kelmeıtinderdiń qatarynda kókek ákeler ǵana emes, bala-shaǵasyn kúıeýine tastap, gákký qaǵyp ketken áıelder de bar.
Alıment tólegisi kelmeıtinderdi táýbege keltirip otyratyn túrli sharalar bar. Alaıda, olardyń kóbinen túrli aıla-sharǵymen qutylyp ketip júrgender jetkilikti. Sondyqtan da Almatyda alıment tólemeıtinderge arnalǵan «túrme», ıaǵnı bala-shaǵasyn baǵýdan qashyp júrgenderdi ustaıtyn úı salý máselesi kóterilip júr.
Almaty qalalyq Qoǵamdyq keńesiniń sońǵy otyrysynda keńes músheleri alıment tólemeıtinderge arnalǵan úı salý máselesin kóterdi. Endigi jerde bularǵa arnaýly túrme salynbasa da, Seıfýllın dańǵylyndaǵy, buryn jabylyp qalǵan tergeý barysyndaǵy ýaqytsha qamaý ızolıatorynda alıment tólemeıtinder 40 táýlik boıy qamaqta bolýy ǵajap emes.
Sol sııaqty qala ákiminiń orynbasary Erlan Áýkenov te halyqaralyq standarttarǵa saı keletin qonaqúıin salýdy usynyp otyr. Biraq bul jobanyń quny 1,4 mıllıard teńgeni quraıdy.
«Zań júzinde alıment tóleýden múlde basyn ala qashqandardy 40 táýlikke deıin bas bostandyǵynan aıyrý máselesi qarastyrylyp otyr. Bir jyl buryn prokýratýranyń usynysymen Seıfýllın dańǵylynda jabylyp qalǵan tergeý ızolıatoryn qalanyń kommýnaldyq menshigine alý máselesi kún tártibine qoıyldy», deıdi ákimniń orynbasary.
О́z kezeginde bul máselede Qoǵamdyq keńes Túrksib aýdanynda bos turǵan kámeletke tolmaǵandardy beıimdeý ortalyǵyn paıdalanýdy usynyp otyr. Bul ǵımaratqa 10-15 adam syıady. Bir kezde atalǵan ortalyq otbasynda zorlyq-zombylyq kórgen áıelderge arnalyp qaıta jabdyqtalǵan-dy.
Jergilikti bılik qazir alıment tólemeıtinderdi táýbesine túsiretin jerdi tabýǵa tyrysyp baǵýda. Qazir Túrksib aýdanyndaǵy joǵarydaǵy ǵımarat ta qamaq orny retinde qarastyrylyp jatyr. Oǵan deıin Seıfýllın dańǵylyndaǵy, respýblıka menshigindegi ýaqytsha qamaý ızolıatory alıment tólemeıtinderdiń «túrmesine» aınalady.
