Prezıdenttiń aıtýynsha, Jastar jylynyń ıgiligin, eń aldymen, jastardyń ózderi kórýi kerek. Jastarǵa baspana qoljetimdi bolýy tıis. Olardyń joly ashyq bolýy kerek, jaqsy, sapaly ómir súrýi úshin múmkindikter berilgeni jón.
– Mine, Úkimettiń bastamalary, eń aldymen, osy mindetterdi nazarǵa alýy tıis. Biraq mynany umytpaýymyz kerek. Eń basty mindet, «daıyn asqa tik qasyq» degendeı, jastarǵa baqytty ómirdi jasap berý emes, olarǵa óz baqyttaryn ózderi taýyp, maqsattaryna jetýge jaǵdaı jasaý óte mańyzdy, – dedi Memleket basshysy.
Prezıdent alqaly jıynda kelesi jyl Jastar jylynyń jalǵasy retinde Volonterler jyly bolatynyn jetkizdi. Demek bıylǵy is-sharalar aldaǵy jyly jastardy belsendi volonterlik jumysqa tartýǵa ulasady.
– Biraq, olar bul jumysqa tek kredıtter men oqýdaǵy jeńildikter úshin emes, ózderiniń júrek qalaýymen, shynaıy nıetimen kelýi tıis, – dep eskertip ótti Prezıdent.
Osy rette Prezıdent jýyrda Qostanaı qalasynda ótken forýmda júzege asyrylǵan Eko-chellendj jastardyń syndarly baǵytta belsendilik tanytýǵa daıyn ekenin kórsetkenin aıtty. Aldaǵy ýaqytta da saıası mán-mańyzy zor mundaı jumystarǵa jastar kóbirek tartylmaqshy.
Atap óterligi, Memleket basshysy mysal etken «ECO-challenge Qostanai» ekologııalyq aksııasy aıasynda oblys aýmaǵyndaǵy ózen-kólderdiń aınalasy edáýir tazaryp qalǵan bolatyn. Bul is-shara qorshaǵan ortany qorǵaýǵa, jastar arasynda ekologııalyq mádenıetti qalyptastyrýǵa baǵyttaldy. Sol Qazaqstan-Reseı jastar forýmyna barǵan Aqparat jáne qoǵamdyq damý mınıstri Dáýren Abaevtyń ózi de jastarmen birge sý qoımalarynyń jaǵalaýynan kúl-qoqys, tamaq pen ydys qaldyqtaryn jınaýǵa qatysqan edi.
Jalpy elimizde Jastar jyly aıasynda qabyldanatyn sharalardyń tıisti jol kartasy bekitilgeni belgili. Sol josparǵa sáıkes naqty jumystar qazir belsendi júrgizilýde.
Máselen, Úkimet otyrysynda baıandama jasaǵan Premer-Mınıstr Asqar Mamın 1 qyrkúıekten bastap jumysshy mamandyqtary boıynsha bilim alyp jatqan oqýshylardyń stıpendııasy 30 paıyzǵa ósiriletinin aıtty. Bul – shamamen 122 myńdaı oqýshyny qamtıtyn ıgilikti is.
Sonymen qatar áleýmettik az qamtylǵan jáne kóp balaly otbasylardyń balalarynyń joǵary oqý oryndarynda bilim alýy úshin qosymsha 5 myń maqsatty memlekettik bilim granty bólingeli otyr.
Eń bastysy, Jastar jylynda jastar úshin damyǵan memleketterdiń ózinde kezdese bermeıtin jeńildik qarastyrylyp otyr. Ol – jumys isteıtin jastardy baspanamen qamtý baǵdarlamasy. Biraq bul joba ázirge elimizdiń basty úsh qalasynda ǵana júzege asyrylýda.
– Nur-Sultan, Almaty jáne Shymkent qalalarynda jumys isteıtin jastarǵa arnalyp satyp alý quqyǵynsyz jalǵa beriletin úıler salynady. Ol qalalarda jastarǵa jylyna 3 myń páterden beriledi, – dedi Úkimet basshysy.
Jastar jylynyń aıasynda jastarǵa arnalyp bólinetin memlekettik maqsatty granttar sany da kóbeıtilgen. Máselen, bıyldyń ózinde úkimettik emes sektorǵa bólingen 49 granttyń 29-y osy Jastar jylyna laıyqtalǵan.
Aqparat jáne qoǵamdyq damý mınıstri Dáýren Abaevtyń aıtýynsha, memlekettik granttardyń aýqymy turmystyq zorlyq-zombylyqtyń aldyn alý men otbasylyq keńes berýden bastap, jastardyń ekologııalyq belsendiligin arttyrý jáne olardy kásipkerlik daǵdylaryna mashyqtandyrýǵa deıingi keń aralyqty qamtyǵan.
– Bul granttar úkimettik emes sektordyń óz qalaýy boıynsha bólinýde. Uıymdar ózderi beıim jáne mashyqtanǵan jobalary boıynsha qarjylandyrylyp, búginde olardyń jumystary joǵary nátıje kórsetip otyr, – dep atap ótti D.Abaev.
Jalpy, jastardyń jobalaryn qarjylandyrý – Jastar jylynda qolǵa alynǵan aýqymdy sharalardyń bir bóligi ǵana. Mysaly, qazir elimizde «Jas maman», «Jas kásipker» syndy aýqymdy baǵdarlamalar aıasynda jastardy naqty qoldaý sharalary júzege asyrylýda.
Al Elbasynyń bastamasymen qolǵa alynǵan Jastar jylynyń negizgi qorytyndylary jyl sońynda jarııalanady.
