Kózge ottaı basylatyn osy bir altyn qalam ádebıettiń altyn dáýirin qalyptastyrýǵa qomaqty úles qosyp, aǵaly-inili bolyp tabysqan qos darynnyń arasyndaǵy rýhanı baılanystyń dánekerindeı kórinedi. Estelikter bylaı tursyn, Ǵabıt pen Muqaǵalı arasyndaǵy rýhanı toǵysýdyń, syrbaz syılastyqtyń zaý bıikke qulash urǵanyn muzbalaq aqynnyń myna bir óleń joldary-aq aıǵaqtaıdy.
Ǵabeke,
Anda-sanda sizdi kórem,
Sizdi kórsem jomart bir kúzdi kórem.
Eliktep ózińizge esim ketip,
Kógendep aq qaǵazǵa tizdim óleń.
Meıirimmen qaraıtyn Sizdi kórem,
Basqalar úmitterin úzdi menen...
Iá, bul aqynnyń «Ǵabańa» dep atalatyn óleńiniń úzindisi ǵana. Bir-birin shynaıy baǵalaǵan talanttardyń tańǵajaıyp syılastyǵy týraly keńinen aıtýǵa bolar. Aqyndyq qýatyn der kezinde tanyǵan kóńili aq jaılaýdaı aǵasynan alǵan tábáriginiń tarıhyn da tvorchestvoǵa tııanaqty Muqaǵalı aq qaǵazǵa tizbektep ketipti. Kúndelik jazýdy janyna serik etken ol 1973 jyldyń 17 naýryzy kúni qaǵazǵa túsirgen jazbasynda: «О́tken aptada Músirepovte (úıinde – avt.) boldym. Bul adammen jaqyn kelip suhbattasqanym osy. Úıinde ózi jalǵyz eken. Jyly qarsy aldy. Eki saǵattaı áńgimelestik. Men Ǵabeńdi boıyndaǵy darynnyń baryn berip bolǵan adam dep aıta almaımyn. Al boıynda jasyrynyp jatqan janartaýy bar ekendigine kúmánim joq. Ýaqyt-aı!.. Ádebıet, jalpy ıskýsstvo jóninde bolar-bolmas sholý jasap, pikirlestim. Qart áriden oılaıdy. Qazirgi qazaq poezııasy qatty tolǵandyryp júrgen kórinedi. Birdeme desem be deıdi. «Aqqýlar uıyqtaǵandaǵa» tebirenip pikir aıtty, súısinip qaldy, men yńǵaısyzdandym, onymdy túıe qoıdy da, qoıa qoıdy. О́leńder oqydym. Keterde maǵan qalam syılady (altyn qalam)», dep jazady.
Aqynnyń kóziniń qarashyǵyndaı bolǵan bul buıym qalamynyń ushymen dúnıeni dıdarǵa bólegen uly daryndardyń máńgilik dostyǵynyń kýási sekildi. Búgingige estelik bop esip, bolashaq urpaqqa ańyzdaı taraıtyn ásem syılastyqtyń ádemi kórinisi...
ALMATY
